Қызылордада әкімдік үйі мен жерін тартып алған тұрғындар қарсылық білдіруде
500
Қызылордада он бір отбасы далада қалғалы тұр. Өйткені азаматтардың үйлері салынған жерді әкімдік өкілдері мемлекет мұқтажы үшін тартып алмақ- деп хабарлайды Opennews.kz ақпарат агенттігі 31 арнаның "Информбюро" жаңалықтар бөліміне сілтеме жасап.
Тұрғындар әкімдік бізді бірнеше жылдан бері тұрып келген баспанамыздан айырмақ деп ашулы. Өйткені қаланың сол жағалауындағы үйлері орналасқан жер телімдері мемлекет мұқтажы үшін алынып тасталуы қажет. Тіпті кейбір тұрғындардың үйің сүріп тастауға сот арқылы шешім шығарылып қойған. Бірақ оның орнына тұрғындарға әкімдік басқа баспана бермейтін болған."Баста бұл жерде 33 үй отырғанбыз. Оның 23-і Нәлібаев әкім болған кезде өтемақы алып үлгерді. Енді Қазантаев әкім болып келіп, бізді сотқа беріп, үйлеріңді босатыңдар деп жатыр. Ешқандай көмек берілмейді дегенді айтады", – дейді тұрғын Алтынай Накипова.
Барар жер, басар тауы қалмаған он бір отбасы кімнен көмек сұрарларын білмей жыларман күйге түскен. Олар тіпті өз үйлерін трактордың астына жатып қорғауға дайын екендігін алға тартады. Ал әкімдіктегілер бұл тұрғындардың баспанасы өз меншіктерінде емес, құжаттары жоқ дейді. Сондықтан оларға өтемақы төленбейді деп отыр.
"11 отбасының құжаттары жоқтығына қарамастан қала әкімдігі тарапынан кәсіпкерлерден көмек сұралып жатыр. Көшіруге көмек сұрап жатырмыз. Осы тұрғындарға Ақжарма ауылынынан жер учаскелері берілген", – деп мәлімдеді Қызылорда қалалық жер қатынастар бөлімінің сектор меңгерушісі Ғанибек Омаров.
Кәсіпкерлер тарапынан көмек қашан болатыны белгісіз. Ал әкімдіктегілер сот шешіміне сәйкес он бір отбасы тез арада үйлерін босату керек дейді. Бірақ бірнеше жылдан бері тұрып келе жатқан баспаналарынан айырылып, далада қалғалы тұрған жандар көмек берілмей ешқайда көшпейміз деп бекінген.
