Анкарада Ұлттық валюта күніне арналған қазақстандық монеталар көрмесі өтті

12 қараша 2025, 14:52

2 552

Анкарада Қазақстанның Ұлттық валюта күніне орай еліміздің тарихи және айналымдағы монеталарына арналған көрме өтті, - деп хабарлайды "Opennews.kz" ақпарат агенттігі.

Іс-шараны «Көк Ту» қазақ мәдениеті ұйымы мен Қазақстан Республикасының Түркиядағы елшілігі бірлесіп ұйымдастырды.

Көрмеге Түркия монета сарайының бөлім басшысы Яшар Чукур, Әділет және даму партиясының өкілі Жемиле Кынаджы Баран, түрік коллекционерлері, қазақ диаспорасының өкілдері және студенттер қатысты.

Сарапшылардың айтуынша, Қазақстан мен Түркияның ақша жасау технологиялары мен монета дизайны өзара ұқсас.

– Сіздердің монетаңызда діни тұлғалар, мемлекет қайраткерлері мен ғалымдар бейнеленген. Бізде де солай. Монета басу тәсілдері де ұқсас, айырмашылық тек ұлттық ою-өрнекте болып тұр, – деді Яшар Чукур.

Ал түрік саясаткері Жемиле Кынаджы Баран түркі халықтарының ортақ тарихи мұрасына тоқталып, «теңге» атауының шығу тегіне ерекше назар аударды.

– «Теңге» сөзі көне түркілердің «денге» немесе «танга» деп аталған күміс ақшаларынан шыққан. Бұл біздің халықтардың тарихи және мәдени байланысының айқын дәлелі, – деді ол.

Көрменің мақсаты – қазақстандық ұлттық валютаның тарихы мен мәдени маңызын таныстыру, сондай-ақ Түркия мен Қазақстан арасындағы мәдени және экономикалық байланыстарды нығайту болды.