Қызылордада жеке мектеп оқушыларына әлеуметтік көмек беріле ме?

16 тамыз 2022, 18:10

2 404

Облысымыздағы атаулы әлеуметтік көмек алушы отбасылардың барлығына бірдей материалдық көмек көрсетілмеуі мүмкін - деп хабарлайды Opennews.kz ақпарат агенттігі.

Қызылорда облысында әлеуметтік көмекті қажет ететін 31 312 балаға «Мектепке жол» қайырымдылық акциясы аясында Міндетті оқу қоры есебінен бір реттік көмек берілу жоспарланған. Оның ішінде, атаулы көмек алатын отбасылардың саны - 12 748, күн көріс көрсеткіші төмен отбасылар – 15 377, ал жетім және ата-ана қамқорлығынсыз балалардың саны - 593. Сонымен қатар білім беру ұйымының алқалы басқару органы айқындаған 2594 балалар бар. Ол үшін ата-аналар құжаттарын білім ұйымдарына ұсынуы тиіс.

Оқу жылының басталуына небәрі санаулы күндер қалды. Алайда, көпбалалы аналардың басым көпшілігі мемлекет тарапынан қарастырылған оқушыларға берілетін қаржыдан қалыс қалуы ықтимал. Себебі, білім басқармаларының ақылы мектепте білім алатын аз қамтылған отбасыларының балаларына қаржы берілмейді деп бас көтерген аналар тиісті қаржыдан қағылып отырмыз дейді.

«Менің екі ұлым ақылы мектепте оқиды. Себебі мемлекеттік мектептің берген біліміне қанағаттанбағандықтан ауыстырдым. Амал жоқ, білімді ұрпақ тәрбиелеу үшін біраз нәрседен бас тартып отырмыз. Ал, қалалық білім бөлімінің мамандары атаулы әлеуметтік көмек алсақ та, тиесілі мектеп формасын алуға қаржы берілмейтіндігін кесіп айтты. Сонда қалай болғаны? Ақылы мектепте оқиды екен деп, бәрінен құр қаламыз ба?»,- дейді Жеңіскүл.

Ал, қалалық білім беру бөлімі мен облыстық білім басқармасы көтерілген мәселенің шешімін таппаған сыңайлы. Алайда, аналар өңіріміздегі 5 ақылы мектеп басшылығы қалалық білім басқармасына бағынбайды екен деп наразылығын білдіруде.

«Қалалық білім бөліміне барғанымызбен мардымды жауап ала алмадық. Жеке мектептер бағынбайды деген маманның жауабын алдық. Ал, аз қамтылған отбасы болсақ та көмек көрсетілмейтіні қалай»,- дейді Достық Жамбыл.

Ең қызығы берілетін қаржы әлі күнге дейін талқылану үстінде екен. Ал мектеп табалдырығын аттауға санаулы күндер қалып отыр. Берілетін көмекке арқа сүйеп отырған отбасы мүшелері балаларымызды оқу жылына дайындамай тиісті қаражатты күтіп отырмыз дейді.

Жуырда мектеп оқушыларын киіндіру үшін 36 000 теңге жеткілікті деген білім министріне біршама аналардың наразылығы туып отыр.

«Бір баланың спорттық киімі мен аяқ киімі есептелмеген. Оның үстіне мектепке тиесілі құрал-жабдықтары да жоқ. Олар есепке кірмейді ме? Әлде тегін беріле ме? Біле білсеңіз қазір дәптердің өзі 60-70 теңгені құрап отыр. Үкімет есебін берсін дейді оқу жылы қарсаңында қаражатты балаларға жұмсайтыны белгілі емес пе?» ,- дейді Әтіркүл Рахымқызы.

Расында, бүгінгі күні түбіртек ұсынбайтын жергілікті базар сатушыларының айтуынша, бала басына киім әперу үшін 70 мың теңге жұмсалатындығын атап өтті. Ендеше есептеп көрелік,

«Бізде жейде ұл бала мен қыз бала үшін 5000-6000 аралығы, ал белдемше мен шалбар 4000-7000 аралығы, ал пиджак 9000-15000 арасы, енді ауыстырып кию үшін екі шалбар мен екі көйлектің өзіне 20 000 теңге кетеді, спорттық киімдер 10 000 теңгеден басталып отыр. Ал галстук 1500 теңге бағаны біз қоймаймыз бізге келгенде қымбат келеді. Халық оны түсіне бермейді ғой. Басқа дүкендермен салыстырғанда біз де түсіріп береміз ғой, сосын халық базарға жүгіреді.», -дейді киім сатушысы Айман.

Мектеп оқушыларына берілетін қаражатты игерген ата-аналарға қойылатын талап та жоқ емес. Берілген қаражатқа балаларына алған оқу құралдарының есебін беруге міндеттелетін. Ол дегеніміз, арнайы алынған оқу құралдары мен мектеп формасының фотосы мен түбіртектерін сақтап өткізуі тиіс.