Қызылордада бүйрегін ауыстырған тұрғындарға ИХЛ аппараты қолданысқа берілді

Қызылордада бүйрегі ауысқан науқастарға арналған иммунохимиялық анализатор аппараты іске қосылды, - деп хабарлайды "Opennews.kz" ақпарат агенттігі.

Өңірімізде нефрологиялық қызметті дамыту жөніндегі жол картасының «Бүйрегі ауыстырылған тұрғындарға қанындағы такролимус концентрациясын анықтайтын заманауи аппаратпен жабдықтау» тармағын орындау мақсатында «Қалалық орталық емханасы» ШЖҚ КМК-да иммунохимиялық анализатор аппараты алынып, іске қосылды.

2023 жылдың шілде айының 10 жұлдызынан бастап емхананың диагностика бөлімінің зертханасында ИХЛ аппараты орнатылып, бүйрегі ауыстырылған тұрғындарға «такролимус» зерттеуі жүргізілуде. Онда аптасына 2 рет сынама алынады. Қорытындысы сол күні нефролог дәрігеріне беріліп, науқастың жағдайы бақыланып отырады.

Айта кетейік, бүгінде Қызылорда облысында бүйрегі ауыстырылған 82 тұрғын бар.