17,3 миллион теңге: медициналық сақтандыру қоры төрағасының жылдық жалақысы
Әлеуметтік медициналық сақтандыру қорының (ӘМСҚ) басқарма төрағасы Әбілқайыр Сқақов қанша жалақы алатыны белгілі болды, - деп хабарлайды "Opennews.kz" ақпарат агенттігі.
ӘМСҚ коммерциялық емес акционерлік қоғамының директорлар кеңесі қордың басқарма төрағасы жалақысының шекті мәндерін белгіледі.
"Қазіргі басқарма басшысының жалақысы белгіленген ең төменгі деңгейде – "таза" 1,39 миллион теңге", - делінген хабарламада.
ӘМСҚ топ-менеджерлер сыйақысы туралы да айтты. Ұйым мәліметінше, басқарма төрағасын қоса алғанда, басқару командасы жылына 10 ең төменгі жалақы (ЕТЖ) мөлшерінде сыйақы алады. 2023 жылы бұл 700 мың теңге (2022 жылы ӘМСҚ қызметкерлері сыйақы ретінде 600 мың теңге алған).
"Олардың әрқайсы жалпы жалақы (демалыс пен емдік жәрдемақыны қосқанда) және жылына 10 ең төменгі жалақы мөлшерінде үстемеақы алады", - деп түсіндірді қор.
Осылайша, Әбілқайыр Сқақовтың бір жылдағы жалақысы мен бір сыйақысы шамамен 17,3 миллион теңге болады.
