220 мыңға жуық тұрғын МӘМС жүйесіне тіркелмеген

5 сәуір 2024, 16:39

2 557

Жамбыл облысында 219 990 тұрғын міндетті медициналық сақтандыру жүйесіне тіркелмеген, - деп хабарлайды "Opennews.kz" ақпарат агенттігі.

Есепте жоқтардың қатарындағы 218 490 азамат жұмыссыз болса, 7581-і 2023 жылғы 16 қарашадан 2024 жылғы 19 наурыз аралығында тұрақты жұмысқа орналасқан.

Бұл туралы Жамбыл облыстық әкімдігінде өткен кезекті аппараттық кеңесте «Әлеуметтік медициналық сақтандыру қоры» АҚ облыстық филиалының директоры Ләззат Алимова хабарлады. Сондай-ақ, өңірдегі МӘМС жүйесінің жұмысы туралы баяндаған облыстық денсаулық сақтау басқармасының басшысы Жанар Оспанова

«Бүгінде Байзақ, Қордай, Жамбыл, Шу аудандары мен Тараз қаласында міндетті әлеуметтік сақтандыру ісі баяу жүргізілуде. Тәуелсіз төлем жасаудан бас тартқандардың барлығына ортақ бір себеп, ол – жұмыссыздық. Ауылдардағы азаматтар әл-ауқатының төмендігіне байланысты медициналық көмекке жүгінгенде ғана төлем жасауды жөн көреді. Тұрақты жұмысы бола тұра, сақтандыру төлемдері жасалмаған тұлғалар саны 4161-ге жетіп отыр. Олардың басым көпшілігі білім саласының, ішкі істер органдары мен балабақша қызметкерлері», – деді.

Айта кетейік, бүгінгі күнге облыста әлеуметтік жағдайы төмен 10 110 адам жеңілдік мәртебесіне ие болып, мемлекет есебінен міндетті медициналық сақтандыру пакетіне қол жеткізген.