Соңғы 7 жылда алғаш рет медуниверситет оқытушылары аттестаттаудан өтеді

17 мамыр 2024, 17:08

2 525

ҚР Денсаулық сақтау министрлігі студенттер мен резиденттер арасында аралық тәуелсіз емтихан, сондай-ақ барлық медициналық жоғары оқу орындарының профессор-оқытушылар құрамын аттестаттаудан өткізетінін мәлімдеді, - деп хабарлайды "Opennews.kz" ақпарат агенттігі.

Бүгін Астанада ведомство алқасының отырысы барысында кадрларды даярлау сапасын жақсарту және оқытушылардың құзыреттілік деңгейін арттыру үшін ағымдағы жағдайды талдау жүргізу қажет екендігі атап өтілді.

Тәуелсіз бағалау нәтижелері медициналық жоғары оқу орындарында білім беру процесін жақсартуға бағытталған одан арғы стратегиялар мен бағдарламалардың әзірлемесі үшін, сондай-ақ медициналық білім беру мен ғылыми қызметті дамытудың басым бағыттарын айқындау үшін пайдаланылатын болады.

«Студенттер мен резиденттердің білімін тәуелсіз бағалау, сондай-ақ профессор-оқытушылар құрамын аттестаттау ең алдымен медициналық білім беру сапасын арттыруға және отандық денсаулық сақтау жүйесі үшін кадрлар даярлаудың жоғары деңгейін қамтамасыз етуге бағытталған», - делінген министрліктің ресми мәлімдемесінде.

Оқытушылардың тәуелсіз аттестациясы соңғы рет 2017 жылы өткізілгенін атап өткен жөн.