Медициналық сақтандырудағы қаржы мен төлем мәселесі бойынша мәжіліс өткізілді

1 сәуір 2026, 12:30

2 512

Мәжіліс мінберінде депутат Екатерина Смышляева денсаулық сақтау министрі Ақмарал Әлназарова атына өткір сауал жолдап, дәрігерлердің кәсіби жауапкершілігін сақтандыру жүйесін сынға алды, - деп хабарлайды Opennews.kz ақпарат агенттігі Stan.kz сайтына сілтеме жасап.

Екатерина Смышляеваның мәлімдеуінше, миллиардтаған қаржы бөлінгенімен, нақты төлемдер мардымсыз болып, өтініштердің басым бөлігі кері қайтарылған.

"Науқастар мен медицина қызметкерлерінің құқықтарын теңгерімді қорғау мәселелері басты назарда. Сәуір айында мұндай қорғауды қамтамасыз ететін халықаралық деңгейде мойындалған тетік – медицина қызметкерлерінің кәсіби жауапкершілігін сақтандырудың құқықтық негізі қабылданғанына екі жыл толады. Модель тәжірибеде бір жарым жылдан бері қолданылып келеді. Алайда талдау көрсеткендей, жүйе әзірге қойылған мақсаттарға толық көлемде қол жеткізе алмай отыр. Мәселен, 1,5 жыл ішінде мемлекеттік бюджеттен бөлінген сақтандыру сыйлықақыларының жалпы көлемі шамамен 6 миллиард теңге болса, осы кезеңдегі нақты сақтандыру төлемдерінің көлемі 230 миллион теңгеден сәл ғана асады", – деді депутат Екатерина Смышляева.

"2026 жылғы наурыздағы деректер бойынша, сақтандыру пулы 332 өтінімді тіркеген, олардың тек 52-сі төлемдермен аяқталған, 38-і қаралу үстінде, ал 242-сі немесе 72,9%-ы бойынша бас тарту шешімі шығарылған. Негізгі белсенділік Астана, Алматы қалалары мен Қарағанды, Қостанай және Ақмола облыстарына тиесілі, бұл өңірлер барлық өтініштердің 64%-ын және төлемдердің 70,8%-ын қамтамасыз етеді",- деп сынға алды мәжіліс депутаты Екатерина Смышляева.

Депутат жүйенің бас тарту тәжірибесінде бірізділік жоқ екенін, тәуелсіз сараптамалық комиссиялардың жұмысы біркелкі ұйымдастырылмағанын айтты. Көп жағдайда өтініштердің кері қайтарылуы мүгедектік белгіленбеген жағдайлармен, оқиға мерзімі немесе сақтандыру шартының болмауына байланысты жүзеге асатынын атап өтткен.

"Алайда бір жарым жыл ішінде бірде-бір медицина қызметкеріне адвокат қызметінің шығындары өтелмеген. Яғни, бүкіл жүйе жұмыс істеген кезеңде бұл тетік іс жүзінде іске қосылмаған. Соған қарамастан, медицина қызметкерлері адвокаттардың көмегіне жиі жүгінген", – деді депутат Екатерина Смышляева.