Қазақстанда маймыл шешегіне қарсы екпе салына ма?

Бас санитарлық дәрігер Айжан Есмағамбетова Қазақстанда маймыл шешегінің таралу қаупі аз екенін айтты, - деп хабарлайды "Opennews.kz" ақпарат агенттігі.

Дегенмен Денсаулық сақтау министрлігі маймыл шешегін анықтайтын ПТР-сынамалар алып қойған. Бұл дерт көбіне Африка елдерінде таралады. АҚШ, Еуропада да науқастар бар.

Мамандардың айтуынша, вирус тым жақын қатынаста болған адамдарға жұғады.

“ДДСҰ ұстанымына сай, халықтың бәріне маймыл шешегіне қарсы екпе салудың қажеті шамалы. Себебі вирус тек жақын қатынаста болған жандарға жұғады. Қоғам арасында тарап кететін инфекция емес. Оған әдетте осал топтағылар шалдығып жатады. Отбасы мүшелері не медицина қызметкерлері сынды науқастармен тығыз байланыста болатындарға екпе салуға болады”, – деді ҚР Денсаулық сақтау вице-министрі, Бас мемлекеттік санитарлық дәрігер Айжан Есмағамбетова.