Ақордада Финляндия Президентін қарсы алу рәсімі өтті

28 қазан 2025, 16:26

2 580

"Ақорда" резиденциясында Қазақстан Президенті Қасым-Жомарт Тоқаев Финляндия Республикасының Президенті Александр Стуббты ресми қарсы алды. Бұл – Финляндия басшысының Президент ретінде елімізге алғашқы ресми сапары, - деп хабарлайды "Opennews.kz" ақпарат агенттігі.

Мемлекеттер басшылары бұған дейін БҰҰ Бас Ассамблеясының 80-ші сессиясы аясында Нью-Йоркте кездескен болатын.

Келіссөз барысында Қасым-Жомарт Тоқаев екі ел арасындағы достық пен өзара түсіністікке негізделген ықпалдастықты атап өтіп, инвестиция және сауда салаларындағы әлеуеттің жоғары екенін айтты.

«Сіздің бастамаңызбен өтіп жатқан бизнес-форум екі ел кәсіпкерлерінің іскерлік байланыстарды кеңейтуіне зор мүмкіндік береді. Сондай-ақ, гуманитарлық ынтымақтастыққа ерекше мән береміз. Сапарыңыз серіктестігімізді жаңа деңгейге көтеретініне сенімдімін», – деді Мемлекет басшысы.

Финляндия Президенті Александр Стубб бұл сапардың маңыздылығын атап өтіп, Қазақстанмен ынтымақтастықтың барлық бағытта нығайып келе жатқанын жеткізді.

«Бүгін біздің елден 20-дан астам ірі компания өкілдері келді. Екіжақты қарым-қатынас пен сыртқы саясат саласында ортақ ұстанымдарымыз көп. Біз күрделі халықаралық мәселелердің шешімін бірлесе іздейміз», – деді ол.

Айта кетейік, 2005 жылдан бері Финляндия Қазақстан экономикасына шамамен 500 млн доллар инвестиция салған.