СЫР ИМАМДАРЫ АРАСЫНДА ДӘСТҮРЛІ «ТЕҢБІЛ ДОП – 2026» ТУРНИРІ ӨТТІ

12 мамыр 2026, 13:00

1 507

Қызылорда қаласында дін қызметкерлері арасында салауатты өмір салтын дәріптеу және өзара ынтымақты нығайту мақсатында кіші футболдан облыстық «Теңбіл доп – 2026» турнирі жоғары деңгейде ұйымдастырылды. Наман ата атындағы спорт кешенінде өткен дәстүрлі спорттық дода Сыр өңірі имамдарының басын қосқан тағылымды әрі тартысты шараға айналды.

Жыл сайын дәстүрлі түрде өткізіліп келе жатқан бұл турнир дін қызметкерлері арасындағы ауызбіршілік пен бауырмалдықты арттыруға, олардың спортқа деген қызығушылығын дамытуға, сондай-ақ салауатты өмір салтын кеңінен насихаттауға бағытталған. Сонымен қатар мұндай жарыстар имамдардың өзара тәжірибе алмасуына, достық қарым-қатынасты нығайтуына және ел ішіндегі рухани тұрақтылықты сақтауға өзіндік үлес қосып келеді.

Аталған турнирге облыс көлемінен барлығы 8 команда қатысты. Атап айтқанда, облыстық «Ақмешіт-Сырдария» орталық мешітінің командасы, Қызылорда қалалық мешіттерінің құрамасы, сондай-ақ Арал, Қазалы, Сырдария, Шиелі, Жаңақорған аудандары мен Қармақшы және Жалағаш аудандарының біріккен командалары жасыл алаңда өзара бақ сынасты.

Жарыстың ашылу салтанатында сөз сөйлеген ұйымдастырушылар спорттың адам өміріндегі маңызына ерекше тоқталып өтті. Олар Ислам дінінде де адамның денсаулығына ерекше мән берілетінін, мұсылман адамның рухани тәрбиемен қатар физикалық тұрғыдан да мықты болуы қажет екенін атап айтты. Сондай-ақ мұндай спорттық шаралар дін қызметкерлерінің халықпен етене араласуына, жастарға үлгі болуына және қоғамда салауатты өмір салтын қалыптастыруға ықпал ететіні жеткізілді.

Турнир барысында командалар жоғары дайындық деңгейін көрсетіп, көрермендерге әсерлі ойын сыйлады. Әрбір матч тартысты өтіп, жанкүйерлер ерекше қолдау көрсетті. Алаңда спорттық мәдениет пен өзара сыйластықтың үлгісі байқалды. Имамдар тек діни салада ғана емес, спортта да белсенді екенін дәлелдеп, ұйымшылдық пен шеберліктің жоғары деңгейін көрсетті.

Жарыс барысында шабуыл мен қорғаныс тактикасын шебер үйлестірген командалар арасында тартыс қыза түсті. Әсіресе жартылай финалдық және финалдық кездесулер жанкүйерлердің қызығушылығын арттырып, ерекше эмоция сыйлады. Әр команда жеңіске деген жігерін танытып, соңына дейін табандылықпен күресті.

Турнир қорытындысы бойынша Жаңақорған ауданының командасы үздік ойын өрнегін көрсетіп, жүлделі І орынды жеңіп алды. Команда ойыншылары ұйымшылдық пен жоғары техникалық дайындықтың арқасында қарсыластарынан басым түсті. Ал ІІ орынды Қызылорда қалалық мешіттерінен құралған команда иеленді. Үздік үштікті облыстық «Ақмешіт-Сырдария» орталық мешітінің командасы түйіндеп, ІІІ орынға тұрақтады.

Сонымен қатар жарыс барысында ерекше көзге түскен ойыншылар арнайы номинациялармен марапатталды. Қызылорда қалалық мешіттерінің ойыншысы Айдос Шәкібек шабуыл шебіндегі белсенділігімен ерекшеленіп, «Үздік шабуылшы» атанды. Ал Жаңақорған ауданының қақпашысы Қайсар Болатов шебер ойынымен көзге түсіп, «Үздік қақпашы» номинациясын иеленді. Облыстық «Ақмешіт-Сырдария» командасының мүшесі Айсұлтан Әбдікемал қорғаныстағы сенімді ойыны үшін «Үздік қорғаушы» деп танылды.

Жеңімпаздар мен жүлдегерлерді облыстың бас имамы Дастан Құрманбаев арнайы марапаттады. Ол өз сөзінде спорттың адам өміріндегі орны ерекше екенін айтып, мұндай игі бастамалар алдағы уақытта да жалғасын табатынын жеткізді. Сондай-ақ барлық қатысушыларға алғысын білдіріп, жарысқа белсенді қатысқан командалардың ауызбіршілігіне ризашылығын жеткізді.

Марапаттау рәсімінде жеңімпаз командаларға арнайы дипломдар, кубоктар мен қаржылай сыйлықтар табысталды. Сонымен қатар турнирге қатысқан барлық командаларға алғыс хаттар беріліп, естелік суреттер түсірілді. Бұл шара дін қызметкерлері арасындағы татулық пен достықтың жарқын көрінісіне айналды.

Айта кету керек, биылғы турнирді Қызылорда қаласындағы мешіттер бірлесе ұйымдастырды. Ұйымдастырушылар жарыстың жоғары деңгейде өтуіне атсалысқан азаматтарға, төрешілер мен жанкүйерлерге ерекше алғыс білдірді.

Сыр өңірінде өткізіліп келе жатқан мұндай спорттық шаралар дін қызметкерлерінің қоғамдағы белсенділігін арттырып қана қоймай, жастарды спортпен шұғылдануға үндейді. Сонымен бірге ел ішінде салауатты өмір салтын қалыптастыруға, рухани құндылықтарды дәріптеуге және бірлік пен татулықты нығайтуға үлкен үлес қосып келеді.

ҚМДБ-ның Қызылорда облысы бойынша өкілдігінің баспасөз қызметі