Ата-аналар мектепте берілетін тамақтың сапасына шағымданды

27 октября 2023, 13:38

1 555

Русский перевод этой статьи пока не опубликован. Ниже — оригинал на казахском языке.

Жетісу облысы Ескелді ауданындағы мектепте ата-аналар тамақтың сапасына қатысты наразылықтарын білдірді,- деп хабарлайды "Opennews.kz" ақпарат агенттігі.

Әлеуметтік желіде Б.Жолбарысұлы атындағы орта мектебінде оқушыларға берілетін тамақтың фотосы тараған. Суреттерде картоп пен қырыққабат қосылған борщ, ботқаға ұқсайтын палау мен сүтсіз шайды көруге болады. Ата-аналар мектеп басшылығын балалардың тамақтануына ақша үнемдеп отыр деп айыптады.

"Мұндай түскі астан кейін балалар ғылымға қызықпақ түгілі оқығысы да келмейді", "Аспазға кім мынандай нәрсе пісірткізіп жүр", "Өзіңіз соны жер ма едіңіз? Бізде соғыс болып жатыр ма?" деп жазды желі қолданушылары.

Жетісу облысының білім басқармасы бұл жағдайға қатысты түсініктеме берді.

"Бұл факт ерекше бақылауға алынды. Б.Жолбарысұлы атындағы мектепке комиссия жіберіледі. Қабылданған шаралар туралы қосымша хабарлаймыз", – деді басқарма басшысы Марат Сүлейманов.

Еске салайық, Қазақстанда 1 қыркүйектен бастап оқушылар тегін тамақпен қамтамасыз етілді. Республика бойынша бір түскі астың құны орта есеппен 577 теңгеге деп бекітілген.