Мүгедектігі бар балалардың үйде оқыту шығындарын өтеу ережесі жеңілдейді

Енді мүгедектігі бар балалардың үйде оқытылуына байланысты шығындарын өтеу қызметі автоматты түрде көрсетіледі,-деп хабарлайды Opennews.kz  ақпарат агенттігі.

 Еңбек және халықты әлеуметтік қорғау министрлігі «Мүгедектігі бар балаларды үйде оқытуға кеткен шығындарды өтеу» қызметіне өзгерістер енгізуді жоспарлап отыр. Жаңа ережелер «Ашық НҚА» порталында жарияланған.

Жаңа түзетулер бірыңғай деректер жинау форматын енгізуге, қағаз құжат айналымын қысқартуға, көрсетілетін қызметтің ашықтығын арттыруға және оны толықтай проактивті форматқа ауыстыруға мүмкіндік береді.

Өзгерістер екі негізгі құжатқа енгізіледі:

1. 2021 жылғы № 84 бұйрық – әлеуметтік-еңбек саласындағы мемлекеттік қызметтер тәртібі;

2. 2016 жылғы № 28 бұйрық – үйде оқытуға кеткен шығындарды есептеу және төлеу нысаны.

Жоба 2025 жылғы 1 желтоқсанға дейін талқылауға ашық. Бұған дейін мүгедектікті белгілеуге қатысты 89 мыңнан астам өтінім онлайн қаралған.