Саңырауқұлақ инфекциясын жұқтырғандардың 60 пайызы – балалар

Жамбыл облысында жыл сайын дерматомикоздың шамамен 300 жағдайы тіркеледі. Бұл ауру бойынша эпидемиологиялық ахуал үш ауданда және Тараз қаласында мәз емес, - деп хабарлайды   Opennews.kz  ақпарат агенттігі.

Инфекцияны науқас адамнан да, жануардан да жұқтыруға болады. Бұл ретте тікелей байланыс міндетті емес. Ауру ортақ тарақ, төсек-орын жабдықтары, жөке және басқа да тұрмыстық заттар арқылы таралуы мүмкін.

Микроспория кезінде теріде қабыршақтанатын, аздап қышитын қызғылт-қызыл түсті сақина тәрізді дақтар пайда болуы ықтимал. Егер бас терісі зақымданса, шаш сынғыш келеді.

Сала мамандары бөтен адамның тарағын пайдаланбауға, ал үйдегі мысықтар мен иттерді ветеринарға көрсетіп, тексеруден өткізуге кеңес береді. Монша мен саунаға барған кезде жабық резеңке шәрке киген жөн.