Әйел күйеуіне бір бүйрегін беріп, өмірін сақтап қалды

Шымкент қалалық №1 клиникалық ауруханасында ер адамға жұбайының бір бүйрегі салынды. 21 қазанда жасалған отадан кейін екеуінің де жағдайы тұрақты деп бағаланып отыр, - деп хабарлайды   Opennews.kz  ақпарат агенттігі.

Нұржанның денсаулығы биыл тамыз айында күрт нашарлаған. Жұмыс орнында жүрегі тоқтап, клиникалық өлімді бастан өткерген ол шұғыл түрде ауруханаға жеткізілген. Тексеру барысында бүйрек қызметінің айтарлықтай бұзылғаны анықталып, науқасқа диализ тағайындалған.

Бастапқыда Нұржанға туған әпкесі донор болмақ болған. Алайда медициналық тексеру нәтижелері оның донор болуына мүмкіндік бермеген. Осыдан кейін жұбайы Айгүл бүйрегін беруге шешім қабылдаған.

Қажетті тексерулерден өткен ерлі-зайыпты операцияға бір айға жуық дайындалған. Трансплантациядан кейін Нұржанның зертханалық көрсеткіштері жақсара бастаған.

Трансплантолог дәрігер Рахымжан Жолдыбековтің айтуынша, операцияға дейін науқастың қанындағы креатинин деңгейі айтарлықтай жоғары болған.

Қазір Нұржан мен Айгүл мамандардың бақылауында. Алдағы уақытта ерлі-зайыпты оңалту кезеңінен өтіп, дәрігерлердің тұрақты қадағалауында болады.