25 жыл балаларды емдеген жалғыз комбустиолог сот шешімінен кейін 20 млн теңге өтемақы төлеуге міндеттелді

Руслан Жәнбекеев 25 жыл бойы Атырау қаласында балалар медицинасы саласында еңбек етіп, өңірдегі балаларды емдейтін жалғыз комбустиолог, яғни күйік жарақаттары бойынша маман болған, - деп хабарлайды   Opennews.kz  ақпарат агенттігі. 

Оның қолынан жағдайы ауыр жүздеген науқас өткен. Дәрігердің айтуынша, балалар жарақатының басым бөлігі ата-аналардың қарауынсыз қалдыруынан болады. Олар көбіне смартфонға алаңдап, балалардың қауіпсіздігіне жеткілікті көңіл бөлмейді. Мәселенің күрделі болғаны соншалық, дәрігер ересектердің балалар қауіпсіздігіне қатысты жауапкершілігін күшейтуді ұсынады.

Алайда 2022 жылдың қаңтарында болған қайғылы оқиғадан кейін дәрігердің өмірі күрт өзгерген. Облыстық балалар ауруханасына аяғының дене бетінің шамамен 6 пайызы күйген қыз бала жеткізілген. Үш күннен кейін тамақтан улануға ұқсас белгілерге байланысты оның жағдайы нашарлап, науқас жансақтау бөліміне ауыстырылған. Алайда ол сол жерде көз жұмған.

Сот талқылауы үш жылдан астам уақытқа созылған. Жәнбекеев патологоанатомның қайтыс болғаннан кейінгі қорытындысында күйік аумағының не себепті 20 пайызға дейін ұлғайғанын түсінбейтінін айтады. Сондай-ақ қыз баланы аурухананың бүкіл ұжымы емдегенін атап өтті. 2026 жылдың қаңтарында сот дәрігерді моральдық зиянды өтеу үшін 20 миллион теңге төлеуге міндеттеген.

Медицина қызметкерінің айтуынша, бейнебайланыс арқылы өткен сот процесі туралы ол уақытында хабардар болмаған. Себебі сол кезде басқа қалаға көшіп, жұмыс орнын ауыстырған. Соның салдарынан оның банктік шоттары бұғатталып, мүлкіне тыйым салынған және жалақысының 50 пайызы ұстала бастаған.

Жоғары санатты дәрігердің айлық табысы шамамен 350–400 мың теңге. Несиелері мен қаражатының бұғатталуын ескергенде, бұл ақша күнкөріске әрең жетеді. Банк карталары бұғатталғандықтан, ол тіпті қоғамдық көлікте жол ақысын да төлей алмай қалған.

Жәнбекеев ауруханадан да, кәсіподақтан да қолдау көрмегенін айтып, заң тұрғысынан өзін толықтай қорғансыз сезінетінін мойындайды.

Медицина саласында мамандар тапшылығы өткір тұрған шақта бұл оқиға маңызды сұрақты алға тартады: құқықтық қорғаныс болмағандықтан, денсаулық сақтау жүйесі тәжірибелі мамандарынан айырылуға жол бере ала ма?