Екібастұзда сауда орталығының төбесі опырылып түсті

17 ақпан 2025, 10:00

1 380

Екібастұзда «Maxi Mall» сауда үйінің ғимараты ішінде аспалы төбе құлап, 5 адам зардап шеккен, - деп хабарлайды "Opennews.kz" ақпарат агенттігі.

Төтенше жағдай кеше, 16 ақпан күні болды. ТЖМ-ның телеграмдағы ресми арнасында Екібастұз қаласындағы сауда үйлерінің бірінің төбесі опырылғаны хабарланды.

«М.Әуезов көшесіндегі сауда үйлерінің бірінде 150 шаршы метр алаңда аспалы төбе опырылды. Оқиға орнында шұғыл қызметтер жұмыс істеуде. Зардап шеккендер жоқ», - деп хабарлады ТЖМ.

Павлодар облыстық денсаулық сақтау басқармасы екі ересек, үш балаға медициналық көмек көрсетілгенін мәлімдеді. Оқиғадан кейін, сауда орталығында болған 5 адам Екібастұз қалалық ауруханасына өздері барған. Олардың ішінде 2008, 2009 жылдары туған үш бала бар. Зардап шеккендерді ауруханаға жатқызудың қажеті болмаған.

«Дәрігерлер қарап, алған жарақаттарына амбулаториялық ем тағайындалды», - деп хабарлады Павлодар облыстық денсаулық сақтау басқармасы өкілдері.

Ал өңірлік төтенше жағдайлар департаменті оқиғаның мән-жайын толық анықтау үшін сауда үйі жабылғанын айтты.