Қызылорда облысында браконьерден 14 қап киік еті тәркіленді
Қызылордада полицейлер «Браконьер» жедел-профилактикалық іс-шарасы барысында құқық бұзудың 163 дерегін анықтады, - деп хабарлайды "Opennews.kz" ақпарат агенттігі.
1-28 ақпан күндері аралығында облыс көлемінде «Браконьер» жедел-профилактикалық іс-шарасы өтеді. Іс-шараның басты мақсаты - табиғат қорғау заңнамасын бұзушылықтарды, биологиялық ресурстар объектілері мен өнімдерінің заңсыз айналымын анықтауға және жолын кесуге, экологиялық қылмыстарды ашуға бағытталған.
Жүргізілген рейдтер барысында полицейлер 20 күнде табиғат қорғау заңнамаларын бұзушылықтың 163 дерегін анықтады. Оның ішінде 6 қылмыстық іс және 157 әкімшілік құқық бұзушылық бар. Сондай-ақ жануарлар дүниесiн пайдалану талаптарын және аң аулау қағидаларын бұзудың (ҚР ӘҚБтК-нің 382-бабы) 136 дерегі анықталды.
Заңсыз балық аулаудың (ҚР ӘҚБтК-нің 383-бабы) -12 , тіркелмеген қаруды сақтаудың (ҚР ӘҚБтК-нің 482-бабы) - 5 дерегі анықталып, әкімшілік хаттама толтырылды.
Қазалы ауданында Қызылорда облысы Полиция департаменті жергілікті полиция қызметі басқармасының рота қызметкерлері жедел-алдын алу іс-шарасын өткізу барысында Volkswagen автокөлігін тоқтатты.
Тексеру барысында автокөліктен 14 қапқа салынған киік еті анықталды, айғақ зат ретінде тәркіленді. Тергеу әрекеттері басталды. Сараптамалар тағайындалды. Күдіктіге қатысты сот үйқамақ түріндегі бұлтартпау шарасына санкция шығарды.
