Талай қазаққа арман болған Toyota-Camry-ге қол жеткізу тіптен қиындай түспек
363
Оған себеп – Ресейдегі осы марканы құрастыратын зауыт жұмысының тоқтатылуы. Бұл туралы брендтің ресми сайтында жарияланған болатын,- деп хабарлайды Opennews.kz ақпарат агенттігі Экспресс К сайтына сілтеме жасап.
Кәсіпорынның жабылуы Қазақстан автонарығына да салқынын тигізейін деп тұр.
Kolesa.kz сайтының жазуынша, "Toyota Motor" компаниясы 3 наурызда Ресей аумағына Toyota және Lexus автокөліктерін тасымалдауды тоқтататыны туралы мәлімдеген. Ал 4 наурызда Санкт-Петербург қаласында орналасқан зауыттың жабылғаны туралы жария етілді. Бұл кәсіпорында Camry седандары мен RAV4 кроссоверлері құрастырылады.
Қазақстанға жаңа Camry көліктерінің дені осы зауыттан жеткізіліп келген болатын. Былтыр елімізде ресейлік кәсіпорыннан шыққан 5600 Camry мен 3200 RAV4 сатылған.
Toyota өкілдері бұл проблеманың туындауына аймақтағы логистиканың бұзылуы себеп болды деп отыр. Әзірге зауыт жұмысын қайтадан қашан бастайтыны белгісіз.
