ҚЫЗЫЛОРДАЛЫҚТАР ӨЗ ДЕПУТАТТАРЫН ТАНЫМАЙТЫНДАРЫН АЙТУДА

31 тамыз 2022, 18:05

3 058

Қызылордалықтар қалалық тіпті аудандық, облыстық мәслихат депутаттарын танымайтындықтарын айтуда, - деп хабарлайды Opennews.kz ақпарат агенттігі.

«Халықтың Үкімет мүшелері мен әкімдерге деген сенім мәселесін көтеру керек. Барлық деңгейдегі партия депутаттарының рейтингтері, ең алдымен, дайындалған есептерге емес, нақты істерге, азаматтардың мәселелерін шешуге негізделуі тиіс», - деген болатын Қасым-Жомарт Тоқаев «Аманат» партиясының XXII съезінде.

Мәслихат депутаттары тұрғындармен белсенді жұмыс жасауы керек десек, «атқа мінер азаматтарымыздың халық сенімін ақтап, алға қойған міндеттерін тисінше атқарып жүр ме?» деген сауал туады.
Бүгінде Қызылорда облысындағы депутаттардың жалпы саны 55 адам. Оның ішінде облыстық мәслихат депутаттарының саны 33 болса, қалалық халық қалаулыларының саны 22–ні құрап отыр.
Көңіл қынжылтарлығы қала тұрғындары «аймақ жанашырларын» танымайтындығы болып отыр. Шындығында облыс, қала, тіпті аудан көлемінде мәслихат депутаттарының кім екендігінен бейхабар қала тұрғындары да бар.

«Сайланар алдында естиміз кейін таппай қаламыз. Іздеп барсақ тек қабылдау кестесі бойынша ғана келесіз деп шығарып салады. Қабылдау күні барсаң жиналыста болады. Қазір қайсыбірі халық алдына шығып, мәселе шешуші еді?»,- дейді қапа болған тұрғын Манат Көпжасар.

Сонымен қатар, Төретам ауылы тұрғыны Мәжіліс депутаты Ғалым Әміреев пен кездесуінде аудандық және облыстық мәслихат депутаттарының дұрыс жұмыс жасамайтындығын айтып, шағым білдірген болатын.

«Аудандық, облыстық депутаттар мүлде жұмыс істемейді. 100 пайыз кепілдік беремін. Көрмейсің біреуін де. Келмейді...», - дейді Төретам кентінің тұрғыны.

Мысалға қалалық мәслихат депутаты Айнұр Шорабекқызы өзінің Facebook парақшасында Эдельвейс саяжайындағы тұрғындармен кездесуін жариялаған болатын. Десе де, саяжай тұрғындары санаулы болғаны ма? 4 саяжай тұрғынымен кездескен фотосын кезіктіруге болады.

Ал, басқа да саяжай тұрғындары депутат ханымның келетіндігінен бейхабар болып шықты.

«Бұрындары депутат дегеніміз халық жанашыры, бір туар тұлға деп танушы едік. Ал, қазір берілген уәде орындалмайтын халге жетіп отырмыз. Оның үстіне топырлағандардың қайсыбірін тани береміз.» ,- дейді Дәметкен Бабаөмірқызы.

Халықтың қалауы мен қажетіне құлақ түрер депутаттардың абыройына шаң түспесе дейміз. Дегенмен сайлау кезінде ғана тірілетін белсенді депутаттар қатары да азаяр емес.