Су тасқынына байланысты 149 мың оқушы жиынтық бағалаудан босатылды
2 522
Су тасқынына байланысты Атырау облысында 149 мың оқушы бөлім және тоқсан бойынша жиынтық бағалаудан босатылды, - деп хабарлайды "Opennews.kz" ақпарат агенттігі.
Атырау облыстық білім басқармасы басшысының орынбасары Орынтай Биманованың айтуынша, Оқу-ағарту министрлігінің 10 сәуірдегі хаттамасына сәйкес, осындай шешім қабылданған.
«Министрліктің хаттамасында су тасқыны болып жатқан аймақтардағы оқушылар бөлім бойынша жиынтық (БЖБ) және тоқсан бойынша жиынтық бағалаудан (ТЖБ) босатылатыны нақты айтылған. Осыған байланысты оқушылар күнделікті онлайн сабаққа қатысып, әр пәннен тапсырма орындау арқылы формативтік қалыптастырушы бағасын алады. Қазір облыс мектептерінде дәріс алып жүрген 149 мың оқушы бар. Олардың бәрі БЖБ және ТЖБ-дан босатылды», -деп хабарлады Орынтай Биманова.
Оның айтуынша, Атырау облысында оқушыларға 9 мыңға жуық педагог дәріс береді. Олардың арасында біліктілік санатын арттыруға арналған аттестациядан өтетін мұғалімдер бар.
«Су тасқынына байланысты мұғалімдердің аттестациядан өту мерзіміне өзгеріс енгізілді. Биылғы аттестация тамыз айына өтеді», -деп мәлім етті Орынтай Биманова.
