Қызылордада 32 жастағы жігіт жеңгесіне бауырын берді
Қызылордада тұңғыш рет бауыр трансплантациясы жасалды. 32 жастағы жігіт 40 жастағы жеңгесіне бауырының бір бөлігін берді, - деп хабарлайды "Opennews.kz" ақпарат агенттігі.
Әйелге он жылға жуық уақыт бұрын бауыр циррозы диагнозы қойылған. Дәрігерлер оған ауырсынуды басу, қабынуды азайту үшін дәрі-дәрмектер қолданып көмектеспек болған. Алайда бұл емнен еш нәтиже шықпаған.
Қиын да күрделі отаны облыстық көпбейінді аурухананың дәрігерлері Н.Сызғанов атындағы ұлттық хирургия ғылыми орталығының бас дәрігері, медицина ғылымдарының докторы, профессор Болатбек Баймаханов бастаған трансплантологтармен бірге жасады.
Облыстық денсаулық сақтау басқармасының басшысы Олжас Искаковтың айтуынша, өңірде 764 адам бүйрек, 76 науқас бауыр ауыстыру кезегін күтіп тұр.
