Президент қазақ-қырғыз шекарасында сауда-логистикалық кешен салу туралы заңға қол қойды
Мемлекет басшысы «Қазақстан Республикасының Үкіметі мен Қырғыз Республикасының Министрлер Кабинеті арасындағы «Қарасу» және «Ақ-Тілек» автожол өткізу пункттері ауданында индустриялық сауда-логистикалық кешенді құру және оның қызметін реттеу туралы келісімді ратификациялау туралы» Қазақстан Республикасының Заңына қол қойды, - деп хабарлайды "Opennews.kz" ақпарат агенттігі.
Кешен «Қарасу» және «Ақ-Тілек» автожол өткізу пункттері жанында орналасады және өндірістік алаңдардан, тауарлар мен жабдықтарды сақтауға арналған қоймалардан, сондай-ақ көлік инфрақұрылымынан тұрады.
Мұнда сүт, ет, жидек-көкөніс, тоқыма және фармацевтика өнімдерін өндіру сияқты кооперациялық жобаларды іске асыруға жағдай жасалмақ.
Индустриялық сауда-логистикалық кешенді құру және оның қызметін реттеу туралы келісімді ратификациялау Қазақстан-Қырғызстан арасындағы сауда және экономикалық байланыстарды нығайтуға әсер етеді және тауар айналымын $3 млрд дейін ұлғайтуға мүмкіндік береді.
