Тоқаев Германияға ресми сапармен барды

Мемлекет басшысы Қасым-Жомарт Тоқаев Германия Федералдық президенті Франк-Вальтер Штайнмайердің шақыруымен Германияға ресми сапармен барды, - деп хабарлайды Opennews.kz ақпарат агенттігі.

Сапар аясында Берлинде Қазақстан Президентінің Германия Президенті Франк-Вальтер Штайнмайермен және Федералдық канцлер Фридрих Мерцпен келіссөздері жоспарланған.

Тараптар Қазақстан мен Германия арасындағы стратегиялық серіктестікті нығайтудың перспективаларын талқылайды.

Сонымен қатар сапар аясында Қазақстан Президенті Мюнхен қаласына барады. Қасым-Жомарт Тоқаевтың Германияның жетекші компаниялары мен қаржы институттарының басшыларымен, жоғары оқу орындарының ректорларымен және ғылыми-зерттеу институттарының жетекшілерімен кездесулері жоспарланған.

Мемлекет басшысы Берлинде өтетін бизнес-форумға және Мюнхенде өтетін технологиялық бизнес-форумға қатысады.