АРАЛДА 6 ЖАСТАҒЫ БАЛА ТҮНДЕ LAND CRUISER АЙДАП ЖҮРГЕН

11 сентября 2026, 11:30

2 528

Русский перевод этой статьи пока не опубликован. Ниже — оригинал на казахском языке.

Қызылорда облысының Арал ауданында 6 жастағы баланың түнгі уақытта Toyota Land Cruiser көлігін басқарғаны анықталды,- деп хабарлайды Оpennews.kz ақпарат агенттігі.

Оқиға 10 қыркүйекте болған. Түнгі патруль кезінде полиция қызметкерлері жол талғамайтын көлікті тоқтатып, рөлде небәрі 6 жастағы бала отырғанын анықтаған. Көлік баланың әкесіне тиесілі болған.

«Кәмелетке толмаған баланың заңды өкіліне қатысты баланы тәрбиелеу және оның қауіпсіздігін қамтамасыз ету жөніндегі міндеттерді тиісінше орындамағаны үшін, сондай-ақ баланың түнде тұрғын үйден тыс жерде болғаны үшін әкімшілік хаттамалар толтырылды», – деді ведомство өкілдері.

Іс сотта қаралып, баланың заңды өкіліне айыппұл салынған.

Полиция департаменті ата-аналарға бала қауіпсіздігіне жауапкершілікпен қарау қажеттігін ескертті.

«Полиция ата-аналарға балаларының қауіпсіздігіне немқұрайлы қарамау қажеттігін ескертеді. Кәмелетке толмағандардың көлік құралдарын басқаруына, сондай-ақ балалардың түнде көшеде қараусыз жүруіне жол бермеңіздер», – деп хабарлады ПД.

Аталған жағдай кәмелетке толмағандардың көлікке қолжетімділігі мен ата-аналардың бала қауіпсіздігіне қатысты жауапкершілігі мәселесін тағы бір мәрте күн тәртібіне шығарды.