2025 жылдан бастап тұрғын үй сатып алудың жаңа ережелері енгізіледі

Келесі жылдан бастап елдегі сұранысқа ие тұрғын үй бағдарламаларына жаңа ережелер енгізіледі, - деп хабарлайды "Opennews.kz" ақпарат агенттігі.

Бұл туралы Үкіметтің кеңейтілген отырысында Отбасы банк басқарма төрағасы Ләззат Ибрагимова мәлім етті.

Отбасы банк басқарма төрайымының айтуынша, көптеген сатып алушылар жаңа пәтердің жөндеу жұмысы шығындарының көп болуына байланысты дайын тұрғын үйді сатып алады. Осыған орай, банк құрылыс компаниялары қауымдастығымен бірқатар кездесулер өткізген. Енді тұрғын үйлер порталда дайын күйінде ұсынылып, сатып алушылар бастапқы 10% жарна төлеп ала алады. Бұл жаңашылдық 2025 жылдың 1 қаңтарынан бастап күшіне енеді.

Сонымен қатар "Бақытты отбасы" бағдарламасы аясында республика бойынша 3,5 мың қарыз беріліп, жалпы сомасы 42,5 миллиард теңгені құрады. Ал "Шаңырақ" бағдарламасы арқылы кезекте тұрған басқа санаттағы азаматтарға қосымша 4,5 мың қарыз беру жоспарланған.