"Алдап шақырып, ұрып-соғып, көлігін тартып алған": Бопсалаушылар тобы сотталды

Вчера, 16:30

1 517

Русский перевод этой статьи пока не опубликован. Ниже — оригинал на казахском языке.

Астананың үш тұрғыны адам ұрлау және бопсалау қылмыстары үшін бас бостандығынан айырылды. Оқиғаның мән-жайын елорда прокуратурасының баспасөз қызметі мәлімдеді, - деп хабарлайды Opennews.kz ақпарат агенттігі.

Қылмыскерлер Telegram мессенджерінде қыздардың атынан жалған аккаунттар ашқан. Сол арқылы ер адамдарды кездесуге шақырып, кейін оларды күштеп қала сыртына алып кеткен. Жәбірленушілерді ұрып-соғып, олардың беделіне нұқсан келтіретін бейнежазбаларды таратамыз деп қорқытқан.

Прокуратураның мәліметінше, қылмыскерлер үш жәбірленушіден бопсалау арқылы жалпы 2,2 млн теңге алған.

"Бір жәбірленушіні микрокредит рәсімдеуге мәжбүрлеп, екіншісінің автокөлігін иемденген", – деп хабарлады Астана прокуратурасының баспасөз қызметі.

Сотта мемлекеттік айыптаушы сотталушылардың кінәсін толық дәлелдеді.

"Сот үкімімен үш сотталушы адам ұрлау және бопсалау қылмыстары үшін 7 жылдан 8 жылға дейінгі мерзімге бас бостандығынан айырылды. Жәбірленушілердің залалды өтеу туралы азаматтық талаптары қанағаттандырылды", – делінген прокуратура хабарламасында.

Үкім заңды күшіне енді.

Прокуратура қазақстандықтарды әлеуметтік желілер мен мессенджерлерде танысқан кезде сақ болуға тағы да шақырды. Сондай-ақ ауырлататын мән-жайларда жасалған адам ұрлау және бопсалау қылмыстары үшін мүлкін тәркілей отырып, 12 жылға дейін бас бостандығынан айыру жазасы қарастырылғанын еске салды.