Қаз
Рус
«Баламсыз тірі шықпайсың»: қазақстандық хирург науқастың әкесінен қысым көргенін айтты
Русский перевод этой статьи пока не опубликован. Ниже — оригинал на казахском языке.
Әлеуметтік желіде Арай есімді хирург шұғыл операция алдында науқастың туысы тарапынан қысымға ұшырағанын мәлімдеді. Дәрігердің айтуынша, ауыр халде жеткізілген жас жігіттің әкесі одан баласының өмірін сақтап қалуды талап етіп, қоқан-лоқы көрсеткен, - деп хабарлайды Opennews.kz ақпарат агенттігі.
Хирург осы оқиға арқылы дәрігерлердің күнделікті қызметінде кездесетін қиындықтар мен медицина қызметкерлеріне деген көзқарас мәселесін көтерді.
Операция алдындағы қоқан-лоқы
Хирургтың әлеуметтік желідегі жазбасына сүйенсек, оқиға күндізгі сағат 14:00 шамасында болған. Ауруханаға шұғыл шақыртумен жағдайы өте ауыр жас науқас жеткізілген. Дәрігерлер оның жүрегіне дереу операция жасау туралы шешім қабылдаған. Арайдың айтуынша, науқас өзінің інілерімен шамалас жаста болған. Операцияға дайындық кезінде жігіттің отбасы келіп, әкесі хирургты оңаша сөйлесуге шақырған.
«Бір кезде баланың отбасы келді. Әкесі мені бөлек шығарып алып: «Менің балама операция жасайтын сен бе?» деп сұрады. Мен «Иә» дедім. «Баламның өмірі сенің қолыңда. Балам аман қалуы керек. Баламсыз сен тірі шықпайсың» деді өте жоғары дауыспен», – деп жазды хирург.
Дәрігердің сөзінше, өзін әлдебір басшылық қызметте жүрген адам ретінде көрсеткен ер адам қоқан-лоқы жасаумен шектелмей, оның қалтасына ақша да салған. Арай мұндай жағдайда сабыр сақтауға тырысқанын жеткізді.
«Аға, біріншіден, балаңыздың өмірі менің қолымда тұрған жоқ. Дәрігерлер тек себепші адамдар, қалғанын Алладан сұрайсыз», – деп жауап бергенін жазды ол.
Алайда хирургтың айтуынша, науқастың әкесі мұнымен тоқтамай, оны қорқытуды жалғастырған. Дәрігер осы жағдайдан кейін көзіне жас алғанын, бірақ өзін қолға алып, кәсіби міндетін орындауға кіріскенін айтты.
«Ақшаң мен байлығың операция бөлмесінде ештеңе шешпейді»
Хирург бұл оқиғаның медицина саласында қызмет еткен жылдары алғаш рет кездесіп отырмағанын атап өтті. Оның айтуынша, дәрігерлер науқастардың туыстары тарапынан түрлі қысым мен қорқытуларға жиі тап болады. Арай адамдардың әлеуметтік мәртебесі мен материалдық жағдайы дәрігердің кәсіби шешіміне әсер етпеуі керектігін ерекше атап өтті.
«Медицинада жүргеніме аз уақыт болған жоқ. Мұндай қорқытудың талайын көрдім десем де болады. Бір қарапайым нәрсені түсініңіздерші: бастық боласыз ба, баспанасыз адам боласыз ба – біз үшін бәрібір. Біз үшін ол – қатардағы пациент. Тіпті адам өлтірген болса да. Сенің байлығың мен ақшаң операция бөлмесінде ештеңе шешпейді», – деп жазды дәрігер.
Ол ұзақ жылдар бойы алған білім мен жинаған тәжірибені ақшамен бағалауға болмайтынын жеткізді.
«Менің сонша жылғы еңбегімді, қаншама жыл бойы алған білімімді арам ақшамен құнсыздандырмаңдаршы!» – деп жазды хирург.
Дәрігердің бұл сөздері медицина қызметкерлерінің кәсіби еңбегін құрметтеу, олардың қауіпсіздігі мен науқастардың туыстары тарапынан жасалатын қысым мәселесін алға тартады.
«Жақынымның қайтыс болғанын естісем де, операцияға кірдім»
Жазбасында Арай дәрігерлік қызметімен байланысты тағы бір ауыр естелігін бөлісті. Бірнеше жыл бұрын күрделі операцияға ассистент ретінде қатысуына небәрі бес минут қалғанда, оған әкесіндей болып кеткен жақын ағасының қайтыс болғаны туралы хабар жеткен.
«Бірнеше жыл бұрын операцияға ассистент болып кіруіме бес минут қалғанда әкемдей болған ағамның өмірден өткені туралы хабар келді, бірақ алдымда мен үшін үлкен операция тұрды. Қаншалықты ауыр болса да, операцияға кіріп, бәрін аяқтадым», – деп еске алды ол.
Хирург дәрігерлердің де өзгелер сияқты сезімі, қайғысы мен жеке өмірі бар екенін, алайда кәсіби жауапкершілік кейде жеке басындағы ауыр жағдайларға қарамастан жұмысын жалғастыруды талап ететінін жеткізді. Ол қоғамда дәрігерлердің мүмкіндігін шексіз деп қабылдайтын көзқарасқа да тоқталды.
«Біз өлген адамды тірілтетін сиқыршы емеспіз. Қолымыздан келгенін де, келмегенін де жасауға тырысамыз. Науқастар жыласа – бірге жылаймыз, күлсе –бірге күлеміз», – деп түйіндеді хирург.
Арайдың жазбасы дәрігерлердің кәсіби жауапкершілігімен қатар, олардың адам ретіндегі сезімі мен еңбегін де ескеру қажеттігін көрсетеді.
Айта кетейік, бұл оқиға хирургтың әлеуметтік желідегі жеке жазбасында баяндалған. Онда айтылған қоқан-лоқы мен ақша ұсыну жағдайларына қатысты ресми органдардың ұстанымы әзірге белгісіз. Сондай-ақ, науқастың операциядан кейінгі жағдайы туралы мәлімет берілмеген.
