22 жасар үш жігіт 30 жастағы ер адамды зорлаған
456
Алматы Полиция департаменті зорланған ер адамға қатысты мәлімет ұсынды, - деп хабарлайды "Opennews.kz" ақпарат агенттігі.
Бұл туралы НеМолчи қорының басшысы Дина Смайылова Алматы қаласында үш жігіттің 30 жастағы ер адамды зорлап, ақшасын тартып алғанын мәлімдеді. Сөзінше, зорлықшылар жәбірленушіге психологиялық қысым көрсетіп, дене жарақаттарын келтірген.
Дина Смайылова ұсынған деректерге сәйкес жәбірленуші 15 қаңтарда түнде шағымданған. Әрі оқиғаны “белгісіз біреулердің тапсырысымен болуы мүмкін” деп топшылады.
“Бұлай деуіміздің себебі зорлықшылар үнемі біреуге қоңырау шалып, не істеп жатқандарын хабарлап отырған. Балағат сөздер мен қоқан-лоқы да гомофобтық сипатта болған. Оған Шариғат талабы бойынша өмір сүру керегін, барша мұсылмандарды ұятқа қалдырғанын айтыпты. Жігіт қарсыласқан. Арада төбелес болыпты, бірақ үш адамға қарсы шыға алмаған”, – деп жазды ол.
Жәбірленуші өзін қорлаған ер адамдардың бірі оны алдап, үйіне шақырғанын мәлімдеген. Жәбірленушінің айтуынша, оны алдын-ала жоспарланған қылмысқа қатысушылардың бірі алдап, үйіне шақырған. Кейін үйге тағы екі белгісіз адам келіп, "зорлық-зомбылық жасаймыз, 500 мың теңге бер" деп талап еткен. Арада төбелес басталып кеткен. Зорлаушылар өлтіреміз деп те қорқытқан.
“Ол өзін Жандос деп таныстырыпты. Бірақ сол жерге тағы екеуі келген. Күш қолданатындарын айтып, 500 000 теңге талап етіпті. Арада төбелес болған. Бірақ жігіттің күші жетпеген. Зорлау бірнеше сағатқа жалғасқан. Қатігездікте шек жоқ, соңында оны өлтіретінін айтыпты”, – дейді ол.
Дина Смайылованың сөзінше, ер адамдар жігіттен ақша сұрап, банкомат арқылы есепшотынан 100 000 теңге шешіп беруді талап еткен. Болған оқиғаға қатысты пікір білдірген полицейлер күдіктілердің 2001 және 2003 жылдары туғанын мәлімдеді.
“Бұл дерек Қылмыстық кодекстің 121-бабы “Сексуалды сипаттағы зорлық-зомбылық әрекеттері” бойынша сотқа дейінгі тергеудің бірыңғай тізіліміне тіркелді. Осы қылмысты ашу мақсатында тергеу-жедел тобы құрылды. Қылмыстың мән-жайы мен орны анықталды. Күдіктілер "ізін суытпай" ұсталды. Олар уақытша ұстау изоляторына қамалды. Ұсталғандар 2001 және 2003 жылы туғандар. Олардың Алматыда тұрақты жұмысы жоқ”, – делінген хабарламада.
