Мектеп директоры 600 мың теңге пара алды деген күдікке ілінді

892
Ақтөбе облысының Шалқар ауданында мектеп басшысы 600 мың теңге пара алды деген күдікпен қамалды, деп хабарлайды Opennews.kz ақпарат агенттігі.


Облыстық сот баспасөз қызметінің хабарлауынша, мектеп директорының ісі Қылмыстық кодекстің «Пара алу» бабымен қаралады. Оған 600 мың теңге пара алды деген айып тағылып отыр.

Ақтөбе облыстық білім басқармасы басшысының міндетін атқарушы Нұргүл Бертілеуованың айтуынша, директор әуелі жұмыстан шеттетілген. Ал қызметтік тексеруден соң орнынан босатылған.

Сот мәліметіне сүйенсек, Қылмыстық кодекстің 366-бабы 2-бөлігімен сотқа берілген Жаңабай Ақмырзаұлы Мусин жөніндегі қылмыстық құқықбұзушылық туралы істің басты талқылауы 27 ақпан күні электронды форматта жүргізіледі. Сотталушы Ж. Мусинге қолданылған «ешқайда кетпеу және тиісті мінез-құлық түрінде» бұлтартпау шарасы өзгеріссіз қалдырылды. Басты сот талқылауы прокурордың және қорғаушының қатысуымен ашық сот отырысында қысқартылған тәртіппен қаралады. Сотталушы жеке қорғаушы жалдаған.

Қылмыстық кодекстің 366-бабы 2-бөлігі бойынша күдікті айыпты деп танылса, мүлкі тәркіленіп, белгілі бір лауазымдарды атқару немесе белгілі бір қызметпен айналысу құқығынан өмір бойына айрылады. Параның елу еселенгеннен алпыс еселенгенге дейінгі сомасы мөлшерінде айыппұл салуға не үш жылдан жеті жылға дейінгі мерзімге бас бостандығынан айыруға жазаланады.