СЫБАЙЛАС ЖЕМҚОРЛЫҚҚА ҚАРСЫ ІС-ҚИМЫЛ МӘСЕЛЕЛЕРІ БОЙЫНША ТАПСЫРМАЛАР БЕРІЛДІ

30 қыркүйек 2024, 14:13

1 147

Аймақ басшысы Нұрлыбек Нәлібаевтың төрағалығымен облыс әкімдігі жанындағы Сыбайлас жемқорлыққа қарсы іс-қимыл мәселелері жөніндегі комиссия отырысынан соң аудан әкімі Ардақ Ибраимовтің төрағалығымен мәжіліс өтті, - деп хабарлайды "Opennews.kz" ақпарат агенттігі.

Мәжілісте облыс әкімінің тапсырмасына сәйкес Жалағаш ауданындағы жұмыспен қамту, әлеуметтік қамсыздандыру, суармалы жерлерді суару, құрылыс нысандарындағы негізгі мәселелерге байланысты салалар бойынша орынбасарлар мен мекеме, бөлім басшыларына нақты тапсырмалар берді.

«Қазақстан Республикасының мемлекеттік қызметі туралы және сыбайлас жемқорлыққа қарсы іс-қимыл туралы Заңдарына сәйкес әрбір мекемеде бағынысты қызметкерлердің Әдеп кодексі мен Сыбайлас жемқорлыққа қарсы іс-қимыл заңнамаларында көзделген шектеулер туралы нормалардың қатаң сақталуы көзделген. Қызметкерлер арасында сыбайлас жемқорлыққа мүлдем төзбеушілік қағидатын қалыптастыруда нақты шаралар қабылдауымыз қажет. Сыбайлас жемқорлық сипатындағы құқық бұзушылықтарды болдырмау, олардың жолын кесу әрқайсыларыңыздың күнделікті жұмыстағы тікелей міндеттеріңіз және азаматтық борыштарыңыз. Бұл мәселе облыс әкімінің де тікелей бақылауында тұрғанын назарларыңызға жеткіземін. Сондықтан, бағынысты мекемеде қызметкерлер арасында сыбайлас жемқорлықтың алдын алу, оларды болдырмау бағытындағы жұмыстарды қатаң бақылауға алуды тапсырамын», – деді аудан әкімі Ардақ Ибраимов.

Мәжіліс қорытындысымен кент және ауылдық округі әкімдеріне, аудан бюджетінен қаржыландырылатын атқарушы орган басшыларына барлық деңгейде бөлінген бюджет қаржысын заңға сәйкес мақсатты, өз мерзімінде және сапалы игерілуін қамтамасыз етуді, Әдеп кодексі мен Сыбайлас жемқорлыққа қарсы іс-қимыл заңнамаларында қарастырылған шектеулердің қатаң сақталуын, сыбайлас жемқорлыққа қарсы стратегиясында белгіленген іс-шаралар жоспарында белгіленген тапсырмалардың сапалы әрі уақытылы орындалуын қатаң тапсырды.