Сырдария аудан әкімі «Алтын күз» облыстық спартакиадасының жүлдегерлерін қабылдады

31 қазан 2024, 11:55

1 219

Аудан әкімі Берік Сәрменбаев «Алтын күз - 2024» ауыл спортшыларының облыстық спартакиадасына қатысып, жүлделі ІІІ орын алған сырдариялық спортшыларды қабылдады, - деп хабарлайды "Opennews.kz" ақпарат агенттігі.

Қабылдауға аудандық ардагерлер кеңесінің төрағасы Мұса Келдібаев, еңбек ардагері Мектепхан Елеусінов және спортшылар қатысты.

Аудан басшысы Сырдария ауданында жалауын желбіреткен облыстық жарыстың жоғары деңгейде ұйымдастырылуына атсалысқан азаматтар мен үздік үштіктен көрінген спортшыларға шынайы ризашылығын жеткізді.

Ауданда спортты дамытуға үлкен қолдау жасалып, мәдени-спорттық шаралар көптеп ұйымдастырылуда. Сырдария ауданында жалауын желбіреткен ауыл спортшылары арасындағы дәстүрлі спартакиада – осының дәлелі. Дүбірлі жарысқа облыс бойынша 1600-ден аса спортшы қатысып, жарыстың 16 түрі бойынша өзара бақ сынады. Аталған іс-шараны жоғары деңгейде өткізуге барлығыңыз атсалыстыңыздар. Ауа райының қолайсыздығына қарамастан, Орталық стадионның безендірілуіне, 4 күнге созылған жарыстың сапалы ұйымдастырылуына қызмет еттіңіздер. Спартакиада Тереңөзек кентімен қоса Н.Ілиясов, Шаған және Ақжарма елді мекендерінде де жоғары деңгейде өткізілді. Осылайша, біз ауызбірлікпен облыстық деңгейдегі ауқымды іс-шараны абыроймен өткізіп, аудан мерейін үстем еттік. Байрақты бәсекеде сырдариялық спортшылар үздік үштіктен көрінді. Сіздерді жеткен жетістіктеріңізбен құттықтай отырып, аудан спортын дамытуға қосып жүрген үлестеріңіз үшін шынайы алғысымды білдіремін, – деді Берік Әбдіғаппарұлы.

Аудан әкімі спортшылар мен ауқымды іс-шараның жоғары деңгейде өткізуіне атсалысқан азаматтарды «Алғыс хатпен» марапаттап, сый-құрмет көрсетті.

Қабылдау барысында аудан әкімі сөз сөйлеп, облыстық спартакиадада топ жарған спортшылардың еңбегін атап өтті: «Бүгін біз сіздердің жеңістеріңізді құттықтап, барша аудан жұртшылығы атынан алғыс айтамыз. Сіздер өздеріңізді тек физикалық тұрғыда ғана емес, рухани тұрғыда да шыңдадыңыздар. Спорт – бұл тек денсаулықты нығайту ғана емес, тұлғалық қасиеттерді дамыту, ең бастысы – еліміздің игілігі үшін еңбек ету», — деді аудан әкімі.

Сонымен қатар, аудан басшысы спортшыларға «Сіздер өз ауылдарыңызға және ауданымызға үлкен абырой әкелдіңіздер. Спорт біздің жастарымызды біріктіретін күш, оларды салауатты өмір салтына тәрбиелейді», — деп сөзін жалғастырды. облыстық спартакиадасының жүлдегерлерін қабылдау шарасы аудан тұрғындарының спортқа деген қызығушылығын арттыруға және жастарды спортқа баулуға бағытталған маңызды қадам болып табылады. Спортшылардың еңбегін бағалап, оларды марапаттау арқылы аудан әкімі жастардың денсаулығын жақсартуға, салауатты өмір салтын насихаттауға және спорттық ынтымақтастықты нығайтуға үлкен үлес қосуда. Сырдария ауданының спортшылары алдағы уақытта да жаңа жетістіктерге жетуге мақсат қойып, ауданның абыройын асқақтата беретіні сөзсіз. Жеңімпаздар мен жүлдегерлердің әрқайсысы өздерінің жетістіктеріне табандылық пен шыдамдылықты көрсету арқылы жеткенін атап өтті.

Қабылдауда аудандық ардагерлер кеңесінің төрағасы М.Келдібаев, еңбек ардагері М.Елеусінов құттықтау лебіздерін жеткізді. Аудандық дене тәрбиесі, спорт және туризм бөлімінің басшысы Б.Есенов көрсетіліп жатқан қолдауларға алғыс білдіріп, кубокті аудан әкіміне табыс етті.