Жол-көлік оқиғасы: 8 адамның өмірі қиылды
1 498
Алматы облысында сегіз адам қаза тапқан жантүршігерлік жол апаты болды, - деп хабарлайды "Opennews.kz" ақпарат агенттігі.
Желіде 29 қыркүйекте болған жол апатының кадрлары пайда болды. Видеода көліктердің бөлшектері тас жол бойына шашылып жатқаны және жақын маңда адамдардың жатқаны түсірілген. Видео авторы олардың бірнешеу жан тапсырғанын да айтады.
Алматы облыстық полиция департаментінің баспасөз қызметі жол апатының Алматы-Бішкек тас жолының 107-шақырымында болғанын хабарлады.
"Полицейлер жол-көлік оқиғасы бойынша сотқа дейінгі тергеуді бастады. Алдын ала мәлімет бойынша, Lexus көлігі қарсы жолаққа шығып кетіп, Toyota Alphard көлігімен соқтығысқан. Алған жарақаттарынан 8 адам оқиға орнында көз жұмды, екеуі ауруханаға жатқызылды. Қазір жол-көлік оқиғасының мән-жайын анықтау үшін барлық қажетті тергеу шаралары жүргізіліп жатыр", – делінген хабарламада.
Полицейлер жүргізушілерді жол қозғалысы ережелерін қатаң сақтауға және жолда аса сақ болуға шақырады.
