Азаматтар әскерге SMS-хабарлама арқылы шақырылады
Астана қаласы қорғаныс істері жөніндегі департаментінің бастығы, полковник Фархат Құрманғажинов мерзімді әскери қызметке шақырылатын азаматтарға SMS-хабарламалар жіберу жүйесі әскерге шақыру процесін тиімдірек ететінін мәлімдеді,- деп хабарлайды Opennews.kz ақпарат агенттігі.
Полковниктің айтуынша, бұрын шақыру қағаздарын табыстау үшін әскери комиссариат қызметкерлері азаматтардың тұрғылықты мекенжайына баруға мәжбүр болған. Бұл транспортқа, жанар-жағармайға және уақытқа қосымша шығын келтіретін.
«Статистика бойынша, он мекенжайға барған кезде тек екі-үш азаматты ғана табатынбыз. Қалғандары мекенжайда тұрмайтын немесе ұзақ мерзімге сапарға немесе вахталық жұмысқа кетіп қалатын. Нәтижесінде хабарландыру жұмыстарының 75–85 пайызы нәтижесіз болып жататын», – деді полковник.
Қазіргі таңда енгізілген жаңа жүйе арқылы SMS-хабарламалар азаматтарға бірден жетеді. Құрманғажинов бұл жүйе әскерге шақыруды жылдам әрі тиімді жүргізуге мүмкіндік беретініне тоқталды.
