Бұрынғы жұбайын мазалаған ер адам қоғамдық жұмысқа тартылды

31 наурыз 2026, 17:30

1 509

53 жастағы ер адам бұрынғы жұбайына қатысты заңға қайшы әрекеттер жасағаны үшін қоғамдық жұмыстарға тартылды, - деп хабарлайды Opennews.kz ақпарат агенттігі kaz.zakon.kz сайтына сілтеме жасап.

Ажырасқаннан кейін де бұрынғы жұбайын мазалауын тоқтатпаған ер адамға қатысты сот шешімі шықты. Бірнеше жыл бойы ол әйелдің тыныштығын бұзып, ескертулерге қарамастан үйіне мас күйінде келіп, жиі қоңырау шалу арқылы оның жеке өміріне қол сұққан. Сот ер адамды кінәлі деп танып, 90 сағат қоғамдық жұмысқа тарту туралы үкім шығарды. Жазаға сәйкес, ол пробация қызметінің бақылауына алынып, құқық бұзушылықтың алдын алуға бағытталған арнайы жұмыстарға қатыстырылған.

Қазіргі уақытта сотталған азамат ауылдық әкімдікте абаттандыру жұмыстарына тартылып, жүктелген міндеттерін орындап жүр. Белгілі болғандай, ол тағайындалған сағаттың бір бөлігін өтеп үлгерген.

"Мен өз қателігімді толық түсіндім. Өз әрекеттеріммен бұрынғы жұбайыма мазасыздық туғызып, оның тыныштығын бұзғанымды енді түсінемін. Ол кезде мен өз әрекеттерім арқылы оны қайтарып аламын деп ойладым, ол менің сезіміме сеніп, қайта оралады деп үміттендім. Біздің үш кәмелетке толмаған баламыз бар, мен ең алдымен соларды ойлап, оларға үлгі болуым керек. Қазір мен өз мінез-құлқымды қайта қарап, өмірге деген көзқарасымды өзгертуге, зиянды әдеттерден бас тартуға тырысып жатырмын. Тағайындалған сағаттарды адал өтеуге, қорытынды жасап, мұндай әрекеттерді енді қайталамауға ниеттімін", — деді сотталған.