Әлеуметтік маңызы бар тауарға бағаны негізсіз көтерген кәсіпкер анықталды
Шығыс Қазақстан облысында кәсіпкер әлеуметтік тауарды 127% үстеме бағамен өз өзіне қайта сатқан,- деп хабарлайды Opennews.kz ақпарат агенттігі Sputnik.kz сайтына сілтеме жасап.
Сауда және тұтынушылардың құқығын қорғау департаменті электрондық шот-фактураларды талдау барысында бағаларды жасанды түрде көтеру схемасы анықталған. Өңірдегі жеке кәсіпкерлердің бірі жасанды делдалдық буын құрған. Кәсіпкер тауарларды, яғни қарақұмық жармасы, қант, тұзды сатып алып, оларды өзіне қарасты ЖШС-ға қайта сатқан. Осындай "өзіне өзі қайта сату" нәтижесінде халық үшін маңызды тауарлардың соңғы бағасы негізсіз өскен.
"Мәселен, қарақұмық жармасына 127% сауда үстемесін қосқан. Сатып алу бағасы 241 теңге болса, 550 теңгеден сатылған. Ал қантқа сауда үстемесі 45% жеткен. Ас тұзына 41% сауда үстемесін қойған", - деп жазылған хабарламада.
ҚР заңнамасына сәйкес әлеуметтік маңызы бар тауарларға сауда үстемесі 15%-дан аспауы тиіс. Құқық бұзушыға қатысты әкімшілік іс қозғалып, айыппұл салынды.
