Әскери қызметтен босатуға уәде берген алаяқ әшкереленді

Ақтөбеде полицияға әскери қызметке шақыруға байланысты медициналық комиссиядан өтіп жүрген 20 жастағы тұрғын жүгінді,- деп хабарлайды Opennews.kz ақпараттық агенттігі Mail.kz сайтына сілтеме жасап.      

Жәбірленушінің айтуынша, бейтаныс азамат 250 мың теңге көлеміндегі сыйақыға әскери қызметтен кейінге қалдыру рәсімін жасап беруге уәде еткен. Оның сөзіне сенген жас жігіт көрсетілген соманы қолма-қол тапсырған. Алайда ақшаны алғаннан кейін күдікті байланысқа шықпай, берген уәдесін орындамаған. Жедел-іздестіру іс-шаралары барысында полиция қызметкерлері күдіктінің жеке басын анықтап, оны полиция бөліміне жеткізген. Ол 21 жастағы жергілікті тұрғын болып шыққан. Тергеу барысында оның алған қаражатты жеке қажеттіліктеріне жұмсағаны анықталған.
Аталған факті бойынша алаяқтық дерегімен сотқа дейінгі тергеп-тексеру бастаған. Қазіргі уақытта істің барлық мән-жайы анықталып жатыр. Полиция азаматтарды сақ болуға шақырды.

Тәртіп сақшыларының айтуынша, әскери қызметке қатысты барлық шешімдер қолданыстағы заңнамаға сәйкес тек уәкілетті мемлекеттік органдар арқылы қабылданады.