"Тез таусылып қалады": Қызылордада тұрғындар қант алу үшін сағаттап кезекке тұруға мәжбүр
Қызылордада тұрғындар қант алу үшін кезекке сағаттап тұруға мәжбүр, деп хабарлайды Opennews.kz ақпарат агенттігі Астана арнасына сілтеме жасап.
Күннің аптап ыстығына қарамастан халық таңғы 7-ден бастап дүкендердің алдын торуылдайды. Себебі өзге сауда орындарында шекердің бағасы екі есе қымбат. Ал қарапайым халық оны қалтамыз көтермейді дейді.
Қаладағы 36 әлеуметтік дүкендегі күнделікті көрініс осындай. Халық 370 теңге тұратын 1 келі қант үшін таңғы 7ден кезекке тұруға мәжбүр. Жалпы алғанда, сауда нүктелерінде тапшылық жоқ. Алайда бағасы әлеуметтік дүкендермен салыстырғанда 2 есе қымбат. Сондықтан айлықтан айлыққа әзер жететін жұрт кезекте сағаттап тұрудан басқа амал жоқ дейді.
“9 жарымда келдім осы жерге. Содан тұрмын. Балаларым азанда 7-ден бері осы жерде жүр. Бірақ балаға берілмейді деген әңгіме болып жатыр. Бала үшін тұрмыз, беруін талап етеміз. Мен көпбалалы анамын. Күміс алқамын. Қолымда 3 немерем бар. Сонда менің үйімде 11 адам өмір сүріп жатыр. Мен 1 кг қантқа 11 адамға тұрмаймын ғой”, – дейді қала тұрғыны Ғалия Үсенова.
Әлеуметтік дүкендерде жан басына 1 келі қант қана беріледі. Өкінішке қарай, мұны да өз пайдасына жаратып жатқандар бар. Саудагерлер камераға айтуға келіспегенімен, күнде 1 адамның қайталап келіп тұратынын жасырмады. Сондай-ақ, әлеуметтік желілерде арзан қант сатамын деген жарнама толып жүр.
Аймаққа қант Тараз, Алматы қаласынан және Ресейден тасымалданады. Жауапты басқармадағылар көршілерден келетін жүйенің бұзылуы бағаның шарықтауына әсер етті дейді. Тапшылықты да сонымен байланыстырады.
Қазір тұрақтандыру қорының қоймасында 3 аптаға жететін қант бар. Ал одан кейін жағдай қалай болатынын ешкім нақты айта алмайды.
