Жаңақорған ауданының әкімі Мажит Самитов 100 орындық мәдениет үйінің құрылысын бақылады
Сыр өңірінде халықтың әлеуметтік жағдайын жақсартып, ауыл инфрақұрылымын дамыту бағытында жүйелі жұмыстар жалғасып келеді. Осы орайда, Қызылорда облысының әкімі Нұрлыбек Машбекұлы Нәлібаевтың бастамасымен жүзеге асып жатқан "Ауыл – ел бесігі" ұлттық жобасы аясында көптеген елді мекендерде маңызды нысандар бой көтеруде, - деп хабарлайды "Opennews.kz" ақпарат агенттігі.
Соның айқын дәлелі – Жаңақорған ауданы, Екпінді ауылында 100 орындық мәдениет үйінің құрылысы. Елді мекен тұрғындары көптен күткен бұл әлеуметтік нысан ауылдың мәдени тынысын жандандырып, жастар мен тұрғындардың шығармашылық әлеуетін арттыруға жол ашады.
Құрылыс барысы бақылауда
Қазіргі таңда нысанның бірінші және екінші қабаттарының сыртқы және ішкі қабырғаларын кірпішпен қалау жұмыстары толық аяқталған. Құрылыстың сапалы әрі белгіленген мерзімде жүргізілуі – жергілікті билік назарында.
Осы мақсатта, Жаңақорған ауданының әкімі Мажит Самитов пен аудандық мәслихат төрағасы Жарқынбек Ғалымжан құрылыс алаңына арнайы барып, жұмыс барысымен танысты. Жауапты мердігерлер мен құрылысшыларға нақты тапсырмалар беріліп, нысан сапасының ұдайы бақылауда болатыны ескертілді.
Халық үшін маңызды нысан
Мәдениет үйі – тек өнер мен шығармашылықтың ордасы ғана емес, ауыл тұрғындарының рухани дамуына серпін беретін маңызды кеңістік. Мұндай әлеуметтік нысандар ауыл жастарының бос уақытын тиімді өткізуіне, өнерге бейім ұрпақты тәрбиелеуге мүмкіндік береді.
Жыл соңына дейін пайдалануға беріледі
Жобалаушылар мен мердігер ұйым нысан құрылысын 2025 жылдың соңына дейін аяқтап, пайдалануға беруді жоспарлап отыр. Құрылыс толық аяқталғаннан кейін ауыл тұрғындары үшін заманауи, ыңғайлы, көпфункционалды мәдениет ошағы өз есігін айқара ашпақ.
"Ауыл – ел бесігі" жобасы аясында атқарылып жатқан бұл жұмыс – ел басшылығының ауыл халқына деген қамқорлығының нақты көрінісі. Екпінді ауылындағы мәдениет үйі – аймақтағы ауылдар үшін үлгі боларлық нысан болары сөзсіз. Мұндай бастамалар ауылдың әлеуметтік-мәдени әлеуетін арттырып қана қоймай, халықтың туған жерге деген сенімін де нығайтады.
