Биыл 1-сыныпқа баратын балалардың 70%-ы қазақ тілінде оқытуды таңдаған

15 маусым 2023, 13:02

1 323

Мектеп табалдырығын аттауға өтініш бергендер қатары 250 мыңға жуықтады. Оқу-ағарту министрлігі биыл балалардың 70 пайызы мемлекеттік тілде білім алуға ниетті екенін жазды, - деп хабарлайды "Opennews.kz" ақпарат агенттігі.

Елімізде 1 сыныпқа қабылдау сәуір айының 1-і мен тамыздың 1-ші жұлдызына дейін жалғасады. Қазірдің өзінде 249 737 өтініш түсіпті. Оның ішінде балалардың 70 пайызы қазақ тілінде оқытуды таңдаған.

“Құжаттарды қабылдау штаттық режимде жүргізілуде. Ата-аналар белсенділік танытып жатыр. Биылғы бірінші сыныпқа қабылданушылар арасында мемлекеттік тілде оқығысы келетіндер көп. Қазақ тілінде оқытатын сыныптарға қабылдау бойынша Қызылорда (94,1%), Маңғыстау (93,2%), Ұлытау (82,5%), Түркістан (80,6%) және Жамбыл (79,4%) облыстары ең жоғары көрсеткішпен алда тұр”, – деді комитет төрағасының орынбасары Жомарт Қарамбаев.

Азаматтарға ыңғайлы болу үшін құжаттарды қабылдау мемлекеттік қызметі толығымен автоматтандырылған. 1-сыныпқа қабылдау Еgov.kz электронды үкімет веб-порталы арқылы жүзеге асырылады.

Бірінші сыныпқа балалар 6 жастан бастап ата-анасының немесе баланың заңды өкілінің өтініші негізінде қабылданады.

Сондай-ақ денсаулық жағдайы туралы құжаттар (026/у-3 нысаны және 065/у) және 3х4 өлшемді 2 фотосурет қоса беріледі.

Алдын ала болжам бойынша, жаңа оқу жылында 410 мыңнан астам бала бірінші сыныпқа барады деп күтілуде.