БАЛАБАҚШАДАҒЫ СОРАҚЫЛЫҚҚА БАСҚАРМА ЖАУАП БЕРЕ МЕ?

26 қыркүйек 2025, 10:45

5 269

Қызылордада жеке балабақшада тәрбиешінің балаға қол көтерген сәті түсірілген бейнежазба тарады. Бұл оқиға қоғамды дүр сілкіндіріп, білім беру жүйесіндегі бақылаудың әлсіздігін ашып берді, - деп хабарлайды "Opennews.kz" ақпарат агенттігі.

Желіде тараған жазбада тәрбиешінің кішкентай балаға қол көтергені анық көрінеді. Кейін белгілі болғандай, бүлдіршін жабық ми жарақатын алып, аурухананың нейрохирургия бөлімшесіне жатқызылған.

Оқиға бойынша балабақша меңгерушісі жағдайды ақтап алуға тырысып, "тәрбиешінің қолындағы таяқ үлкен емес, қаламдай ғана таяқ" деп түсіндірді. Сондай-ақ "бала керуеттен емес, жанындағы тепшектен құлаған" деген ақпарат таратты. Бірақ бейнежазба қоғамдағы ашу-ызаны баса алған жоқ.

Қызылорда қалалық білім бөлімі бұл оқиғаға байланысты ресми түрде:

"Мәселе бақылауға алынды. Зерделеу жұмыстары жүргізіліп, нәтижесі қосымша хабарланатын болады," – деген қысқа ғана мәлімдеме жасады.

Облыстық білім басқармасының бұл мәселеге үнсіздігін желі қолданушылары сынға алуда.

Балалар құқығын қорғаушы Жақсыгүл Тоғанованың айтуынша:

"Жеке балабақшаларға қатысты мәселе туындаса зерделеу жұмыстары жүреді. Талапқа сай болмаса жабуға ұсыныс беріледі. Одан бөлек ата-ана шағымы түссе де тексеріледі. Жалпы "Сырғалымға " қатысты тексеру жұмыстары менің тарапымнан ғана емес, қалалық білім бөлімі мен құзырлы органдар да тексеруде. Алдағы уақытта қабылданған шешім қосымша хабарланады. Менің басты мақсатым бала құқығы тапталмаса екен деймін."

Заңгерлердің пікірінше, бұл жағдайда тек тәрбиеші ғана емес, балабақша басшылығы мен қадағалаушы мекемелер де жауапқа тартылуы тиіс. Өйткені Қылмыстық кодекспен қаралатын ауыр құқықбұзушылық орын алғанын алға таратуда.

Бұл оқиға – бір ғана тәрбиешінің әрекеті емес, білім беру саласындағы жүйелік кемшіліктің көрінісі. Балаға қол көтеру фактісінің өзі – қоғам үшін дабыл. Басты сұрақ әлі де ашық тұр:

Ал баланың құқығы аяққа тапталғанда, білім басқармасы неге үнсіз қалды?

КҮНЕКЕЙ