Еліміздің дәріханаларында парацетамол тапшылығы біліне бастады

Қазақстанның бірнеше өңірінде қызуы көтерілген жұрт дәріханалардан парацетамол таппай жүр, деп хабарлайды Opennews.kz ақпарат агенттігі “Информбюро” бағдарламасына сілтеме жасап. 




Сұранысқа ие дәрінің тапшылығы әсіресе Павлодар, Қарағанды, Ақтөбе облыстарында туындаған. Ал фармацевтер парацетамолдың екі айдан бері сатылымда жоқ екенін айтады. Сондықтан олар амалсыздан парацетамолдың балаларға арналған немесе балама түрін ұсынуда.

Ал жауапты орган мамандары парацетамолға тапшылық өңірлерде байқалмайды деп отыр. Айтуларынша, республика бойынша қазір көтерме және бөлшек сауда желісінде қызуға қарсы әр түрлі дәрілердің тоғыз миллионға жуық қаптамасы бар. Ал қоймада парацетамолдың 1,3 миллионға жуық қаптамасы дайын екен. Мамандар емделушілерге парацетамол таппаған жағдайда дәрінің балама түрін қолдануға кеңес береді.

Парацетамолмен қатар бірге жүрген парацетамол қосылған дәрілік заттар бар қызуды түсіретін. Олар ацетилсалицил қышқылы, ибупрофен, нимесулин секілді дәрілік заттар. Сондықтан да парацетамол түгел жоқ деп айтуға болмайды. Өйткені қызуға қарсы басқа да дәрілік заттар бар, – дейді Денсаулық сақтау министрлігі Медициналық және фармацевтикалық бақылау комитеті төрағасының орынбасары Ләззат Қашқымбаева.