Күрделі операциялар МӘМС арқылы тегін жасалады
Елімізде міндетті әлеуметтік медициналық сақтандыру жүйесі енгізілгелі күрделі операцияларға шамамен 180 млрд теңге бөлінген, - деп хабарлайды "Opennews.kz" ақпарат агенттігі.
Мәселен 2020 жылы жоғары технологиялар қолданылатын операцияларға берілген қаражат 14 млрд теңгені құраса, былтыр 83,5 млрд теңгеге жетті. Былтырдың өзінде МӘМС шеңберінде 400 млрд теңгеден астам сомаға бір млн-нан аса операция жасалған
Елімізде миға пышақсыз операциялар жасалып жатыр. Ұлттық нейрохирургия орталығындағы дәрігерлердің жоғары радиоактивті сәулелермен ем жасауға мүмкіндігі бар. Мәселен гамма-пышақ деп аталатын қондырғымен соңғы 4 жылда 1500-ден аса қазақстандық ем алды. Нейрохирургтер мидағы қатерсіз ісікті әп-сәтте сылып тастайтынын айтады. Осы отандық медицинадағы озық аппараттың игілігін көргендердің – бірі елордалық Раиль Минигулов. Басында ісік бары жақында ғана анықталыпты. Уақыт созбай оған гамма пышақ сәулесімен операция жасалды.
Жалпы жыл сайын 5 мыңнан астам адам осы орталықтағы дәрігерлердің көмегіне жүгінеді. Олардың 95%-і міндетті әлеуметтік медициналық сақтандыру есебінен тегін ем қабылдайды. Соңғы уақытта дертіне дауа іздеп алыс-жақын шет елден келетіндер көбейген. Себебі мұндағы операция құны оларға Еуропамен салыстырғанда едәуір арзанға түседі. Салыстырмалы түрде айтсақ, Германияда миға жасалатын операция 100 мың доллардан асады. Ал біздегі құны шетелдіктер үшін 20 мың доллар. Ал өз отандастарымызға мұндай операциялардың бәрі МӘМС арқылы тегін.
МӘМС қаржысына жасалатын күрделі операциялар қатары кең. Ми, жүрек қантамырлары ауруларын емдеумен қоса, тізе мен жамбас буындарын эндопротездеу, көз ауруларын емдеуге мүмкіндік бар. Соған сәйкес, медициналық мекемелер де жыл сайын озық технологияларды енгізіп жатыр.
