Қызылордадағы балалар ауруханасында шу шықты

22 қыркүйек 2025, 10:00

6 000

Қызылорда облыстық балалар ауруханасында шұғыл көмекке жүгінген ата-аналардан «жұқпалы ауру жұқса – өз жауапкершілігімде» деген мазмұндағы қолхат жаздыру талап етілуде. Бұл жағдай әлеуметтік желіде үлкен пікірталас туғызды, – деп хабарлайды Opennews.kz ақпарат агенттігі.

Баласын жедел жәрдем арқылы жеткізген Айсара есімді тұрғын дәрігерлер стационарлық емге қабылдамас бұрын осындай құжатқа қол қоюға мәжбүрлегенін айтады.

«Баламның жағдайы ауыр болғандықтан жедел жәрдем шақырдым. Ауруханаға келгенде дәрігерлер алдымен осы қолхатқа қол қоюымды талап етті. Егер қол қоймасаңыз, балаңызды қабылдай алмаймыз деді. Тіпті екі полицеймен келіп, видео салғаным үшін қысым көрсетті», – дейді анасы.

Ананың айтуынша, қолхатта ата-аналар жұқпалы инфекция жұқтырған жағдайда, аурухана мен дәрігерлерге ешқандай кінә артпайтынын, барлық жауапкершілікті өз мойнына алатынын растайтыны жазылған.

Қызылорда облыстық балалар ауруханасының әкімшілігі бұл жағдайды жоққа шығарған жоқ.

«Қазіргі уақытта инфекциялық аурулармен ауырған науқастар саны артуда. Балалардың денсаулығын қорғау үшін уақытша шектеулер енгізуге мәжбүрміз. Бұл шара инфекцияның таралуын болдырмауға бағытталған», – деп мәлімдеді аурухана әкімшілігі.

Заңгерлердің пікірінше, азаматтарды еркінен тыс мәлімдеме жазуға мәжбүрлеу – заң бұзушылық. Мұндай жағдайда ата-аналар Денсаулық сақтау басқармасына немесе прокуратураға шағымдана алатынын ескертуде.

Қызылорда облыстық санитариялық-эпидемиологиялық бақылау басқармасы ауруханада қызылшаға күдікті 11, серозды менингит пен скарлатинаға күдікті 2 жағдай тіркелгенін растады. Қазіргі таңда тергеп-тексеру шаралары жүріп жатыр.

«Ауруханада ем алған науқастар арасында қабылдау бөлімінде қызылша ауруына күдікті 11 науқас, серозды менингит пен скарлатина ауруына күдікті бір жағдайдан тіркелуіне байланысты Қызылорда қалалық санитариялық-эпидемиологиялық бақылау басқармасы тарапынан ауруханада тергеп-тексеру іс-шаралары жүргізілуде. Бүгінде ауруханада белсенді инфекциялық ошақ тіркелмеген. Карантин шаралары енгізілген жоқ. Бұзушылықтар анықталса, заңға сәйкес шара қолданылады», – делінген басқарманың хабарламасында.

Осы тұста көкейде жауабын қажет ететін сауалдар туындайды:

– Жаңартудан өткен облыстық жұқпалы аурулар ауруханасы неге толыққанды қабылдамайды?

– Егер ресми түрде карантин енгізілмесе, балалар ауруханасы «шектеу шараларын» заңды негізсіз неге қолдануда?

Бұл оқиға қоғамда үлкен алаңдаушылық туғызуда. Бала денсаулығы – мемлекет үшін басты құндылық болғанымен, жауапкершілікті ата-ананың мойнына артып қою қаншалықты дұрыс?