Үкімет Астананың инфрақұрылымын ауқымды жаңғыртуға кірісті

Қарқынды өсіп жатқан Астана үшін инженерлік инфрақұрылым бүгінде ең өзекті мәселелердің біріне айналды,- деп хабарлайды Opennews.kz ақпараттық агенттігі.

Жаңа тұрғын үй кешендері, әлеуметтік нысандар мен халық санының көбеюі коммуналдық желілерге түсетін жүктемені жылдан-жылға арттырып келеді. Үкімет елорданың инженерлік және энергетикалық инфрақұрылымын жаңғыртуға 16,2 млрд теңгеден астам қаржы бөлген. Тиісті қаулыларға ҚР Премьер-министрі Олжас Бектенов қол қойған. Бөлінген қаражат екі негізгі бағытқа бағытталмақ:

- 8,7 млрд теңге – су бұру және кәріз инфрақұрылымын дамытуға;

- 7,5 млрд теңге – энергетикалық жүйені жаңғыртуға.

Бұл жобалар тұрғындардың күнделікті өміріне тікелей әсер ететін мәселелерді шешуге бағытталған. Соңғы жылдары Астана Қазақстандағы ең жылдам дамып жатқан қалалардың біріне айналды. Жаңа шағынаудандардың пайда болуы, тұрғын үй құрылысының қарқыны және халық санының артуы инженерлік желілерді де қатар дамыту қажеттігін көрсетіп отыр. Үкімет бөлген 16,2 млрд теңгеден астам қаржы дәл осы міндетті шешуге бағытталған. Кәріз жүйесінің жаңаруы, электр желілерінің күшеюі және ЖЭО қуатының артуы алдағы жылдары елорданың тұрақты дамуына негіз болатын маңызды инфрақұрылымдық жобалардың бірі саналады.