«Таза Қазақстан» эко-эстафетасы Қызылордада қорытындыланды
Бір апта бұрын Алматы қаласынан басталған «Таза Қазақстан» road-эстафетасы Қызылордада қорытындыланды. Ауқымды экологиялық бастама 1200 шақырым автожол бойын тұрмыстық қалдықтардан тазарту мақсатында ұйымдастырылды. Бұл туралы қала әкімінің баспасөз қызметі мәлімдеді, - деп хабарлайды "Opennews.kz" ақпарат агенттігі.
Эстафета құрамында «AMANAT» партиясы жанындағы «Жастар рухы» жастар қанатының төрағасы Ақерке Искандирова, сондай-ақ ҚР Парламенті Мәжілісіндегі «AMANAT» партиясы фракциясының мүшелері Мұрат Әбенов, Мархабат Жайымбетов, Амантай Жарқынбекұлы, облыстық және аудандық мәслихат депутаттары, экоблогерлер, еріктілер бар.
Қатысушылар республикалық маңызы бар автожол бойын тазарту жұмыстарымен қатар, «Вандализмге жол жоқ» акциясы аясында Жаңақорған ауданындағы Сығанақ қалашығы айналасында тазалық жұмыстарын жүргізді. Ал Шиелі ауданындағы іс-шара барысында Мәжіліс депутаттары аудан тұрғындарына арнайы қабылдау өткізсе, «Жастар рухы» жастар қанатының төрағасы Ақерке Искандирова аудан жастарымен кездесіп, пікір алмасты. Қабылдаулар мен кездесулер барысында тұрғындар сұрақтарына жауап алды.
Атап өту керек, эстафета аясында тазалық сақшылары 4 облыс, 1 қала және 15 аудан аумағына тазалық жұмыстарын жүргізіп, 10 мың тоннадан астам қоқысты қайта өңдеуге жөнелтті.
Эко-акцияны қорытындылау шарасына қала әкімі Нұржан Ахатов, «AMANAT» партиясы Қызылорда облыстық филиалының атқарушы хатшысы Ләйлә Төрешова, партияның облыстық филиалы жанындағы экологиялық кеңес төрағасы Жорабек Нұрымбетов, еңбек ардагерлері мен белсенді жастар қатысып, ризашылық білдірді.
Тазалық жанашырлары осылайша республикалық маңызы бар автожол бойын тұрмыстық қалдықтардан тазартып, экологиялық мәдениетті қалыптастыруға үлес қосты. Жалпы, ауқымды іс-шараға 3 мыңға жуық белсенді жас қатысты.
