АУДАН ӘКІМІ ОРТАЛЫҚ СТАДИОНДАҒЫ ЖӨНДЕУ ЖҰМЫСТАРЫМЕН ТАНЫСТЫ

8 қазан 2025, 12:40

1 559

Бүгін Жалағаш ауданының әкімі Ардақ Ибраимов Жалағаш кентіндегі орталық стадионда жүргізіліп жатқан жөндеу жұмыстарының барысымен танысты. Спорт нысанындағы жаңғырту жұмыстары Қазақстан футбол федерациясының "ALAN" жобасы аясында жүзеге асырылуда, - деп хабарлайды "Opennews.kz" ақпарат агенттігі.

Сапа – басты назарда

Стадионды аралау барысында аудан әкімі жүргізіліп жатқан жұмыстардың сапасына ерекше көңіл бөлді. Ол жауапты мердігер мекемеге құрылыс барысында пайдаланылып жатқан материалдардың сапасын қатаң бақылауда ұстау қажет екенін ескертіп, нысанды белгіленген мерзімде толық аяқтауды тапсырды.

«Бұл — тек спорт алаңы емес, аудан жастарының бос уақытын тиімді өткізіп, спортпен шұғылдануына мүмкіндік беретін маңызды әлеуметтік нысан. Сондықтан жұмыс сапасына үлкен жауапкершілікпен қарау қажет», – деді аудан әкімі.

Стадион жаңғыртылып жатыр

Қазіргі таңда стадион аумағындағы жасыл алаң толық жаңартылып, спорт инфрақұрылымын жақсартуға бағытталған құрылыс жұмыстары аяқталуға жақын. Жобада футбол алаңының жабындысын жаңарту, жүгіру жолдарын жөндеу, жарықтандыру және қосымша инфрақұрылымдарды жетілдіру қарастырылған.

Жасыл алаң Қазақстан футбол федерациясының «ALAN» жобасы аясында жаңартылып отыр. Бұл жоба еліміздегі өңірлік стадиондарды жаңғырту арқылы бұқаралық футболды дамытуға бағытталған.

Жастар мен бұқаралық спортқа қолдау

Орталық стадиондағы жаңарту жұмыстары аяқталғаннан кейін жергілікті тұрғындар мен жастар үшін қолжетімді, заманауи спорт алаңы пайдалануға берілмек. Бұл өз кезегінде өңірде салауатты өмір салтын насихаттап, бұқаралық спортты дамытуға оң әсер етеді.

Еске сала кетейік:

«ALAN» жобасы – Қазақстан футбол федерациясының бастамасымен қолға алынған әлеуметтік жоба. Оның мақсаты – еліміздегі аймақтарда спорт инфрақұрылымын жетілдіру, жастар арасында футболды кеңінен дамыту.