Қызылордада бруцеллез жұқтырған 70-тен астам мал сойылды

Өткен жылы Қызылорда облысында мал арасында таралуы мүмкін аса қауіпті 13 жұқпалы аурудың алдын алу мақсатында 5 млн 979,7 мың доза ветеринариялық препарат сатып алынған, - деп хабарлайды "Opennews.kz" ақпарат агенттігі.

Облыстық ветеринария басқармасының мәліметінше, биыл бұл көрсеткішті 6 млн 244,7 мың дозаға дейін арттыру жоспарланып отыр.

Сонымен қатар, жұқпалы емес 6 түрлі энзоотиялық аурудың алдын алу үшін облыстық бюджеттен 315,3 млн теңге бөлінген. Қаражат есебінен 799,4 мың доза препарат алынып, вакцинациялау жұмыстары толық көлемде жүргізілген.

Бруцеллез ауруына қарсы жүргізілген тексеру барысында 586,5 мың бас ірі қара мен 1 млн 67,7 мың бас уақ малдан қан сынамасы алынған. Зерттеу нәтижесінде 42 сиыр мен 32 қой-ешкінің ауру жұқтырғаны анықталып, олар ветеринариялық талаптарға сәйкес дер кезінде жойылған.

Басқарма өкілдері өңірде аса қауіпті жұқпалы аурулар тіркелмегенін және эпизоотиялық жағдайдың тұрақты екенін атап өтті.

Қазіргі таңда Қызылорда облысында жалпы саны 1 млн 334 мың бас мал бар. Оның негізгі бөлігін ірі қара мен уақ мал құрайды.