ЖАЛАҒАШ АУДАНЫНЫҢ ӘКІМІ «МЕКТЕБІМ, САҒАН МЫҢ АЛҒЫС!» АТТЫ САЛТАНАТТЫ ШАРАҒА ҚАТЫСТЫ

Аудан әкімі Ардақ Ибраимов №202 З.Жарқынбаев атындағы орта мектебінде өткен «Мектебім, саған мың алғыс!» атты салтанатты шараға қатысып, ұстаздар қауымын, ата-аналар мен мектеп бітіруші түлектерді 2025-2026 оқу жылының сәтті аяқталуымен құттықтады. 

Мектеп қабырғасындағы ерекше мерекелік іс-шара түлектер үшін ұмытылмас сәттерге толы болып, білім ордасымен қоштасқан жас түлектердің өміріндегі маңызды кезеңдердің біріне айналды. Салтанатты жиынға ауданның зиялы қауым өкілдері, ардагер ұстаздар, ата-аналар, мектеп ұжымы мен оқушылар қатысты. Мектеп ауласы мерекелік безендіріліп, түлектерге арналған арнайы концерттік бағдарлама ұйымдастырылды. Әсем әуен мен қимастық сезімге толы кеш барысында мектеп бітірушілер ұстаздарына алғыс айтып, білім ордасымен қоштасты. Шара барысында сөз алған аудан әкімі Ардақ Ибраимов мектеп түлектерін өмірлеріндегі маңызды белеспен құттықтап, оларға үлкен сенім артылатынын жеткізді.

– Құрметті ұстаздар мен ата-аналар! Қымбатты мектеп бітіруші жас түлектер! Сіздерді 2025-2026 оқу жылының сәтті аяқталуымен шын жүректен құттықтаймын! Президентіміз Қасым-Жомарт Кемелұлы: “Мектеп – білім мен тәлім-тәрбиенің киелі ордасы. Өскелең ұрпақты білімпаздыққа баулу қаншалықты маңызды болса, оларға дұрыс жол көрсету, бағдар беру де соншалықты маңызды. Біз жастардың адал әрі еңбекқор болып өсуіне ерекше мән беруіміз қажет” деген болатын. 

Шын мәнінде, ел мен елді, халық пен халықты теңестіретін – білім. Тек білім ғана адамға өмір жолын дұрыс таңдауға, өзіне деген сенімділік қалыптастыруға және биік белестерді бағындыруға мүмкіндік береді. Біздің міндетіміз – балаларымызға дұрыс бағыт-бағдар беріп, егемен еліміздің білімді де білікті азаматы болып қалыптасуына жан-жақты жағдай жасау. Мемлекет тарапынан жасалып жатқан мүмкіндіктерді тиімді пайдаланып, мемлекеттік гранттарды жеңіп алуға ұмтылу – бүгінгі жас ұрпақтың басты мақсаты болуы тиіс.

Құрметті түлектер! Білім көкжиегіне қаққан қанаттарыңыз талмасын. Аудан басшысы ретінде де, ата-ана ретінде де Сіздердің асқақ армандарыңыздың орындалуына тілектестігімді білдіремін! – деді аудан әкімі.

Аудан басшысы өз сөзінде қазіргі таңда мемлекет тарапынан білім саласына ерекше қолдау көрсетіліп отырғанын атап өтті. Жас ұрпақтың сапалы білім алып, заман талабына сай бәсекеге қабілетті маман болып қалыптасуы үшін барлық жағдай жасалып жатқанын жеткізді. Сонымен қатар, жастардың ғылым-білімге ұмтылып, адал еңбек ету арқылы ел дамуына үлес қосуы маңызды екенін айтты. Мерекелік іс-шара барысында мектеп түлектеріне ақ жол тілеп, ұстаздар мен ата-аналар жүрекжарды лебіздерін білдірді. Ардагер ұстаздар жас түлектерге баталарын беріп, елге қызмет ететін білімді азамат болуларына тілектестіктерін жеткізді. Өз кезегінде түлектер де мектеп қабырғасында алған білімдері мен тәлім-тәрбиесі үшін ұстаздарына алғыстарын айтып, естелік сөздермен бөлісті.

Салтанатты кеш өнерлі оқушылардың концерттік бағдарламасына ұласты. Мектеп оқушылары ән шырқап, би билеп, патриоттық рухтағы көркем қойылымдар сахналады. Сонымен қатар, түлектердің мектептегі қызықты сәттері бейнеленген арнайы бейнеролик көрсетіліп, көпшілікке ерекше әсер сыйлады. Шара барысында мектептің қоғамдық өміріне белсенді қатысып, білім мен өнерде жоғары жетістіктерге жеткен оқушылар марапатталды. Түрлі пәндік олимпиадаларда, спорттық жарыстар мен шығармашылық байқауларда аудан намысын қорғаған үздік оқушыларға алғыс айтылып, оларға сәттілік тілектері білдірілді. Айта кетейік, биыл аудан бойынша 470 оқушы мектеп бітіріп отыр. Оның ішінде 414 түлек Ұлттық бірыңғай тестілеуге қатысуға өтініш берген. Сонымен қатар, 20 түлек «Алтын белгіге» үміткер болса, 42 оқушы «Үздік аттестатқа» ұсынылған. Бұл – аудан оқушыларының білім сапасының жоғары екенін көрсететін маңызды көрсеткіштердің бірі. Бүгінде аудан мектептерінде білім беру сапасын арттыру бағытында жүйелі жұмыстар атқарылуда. Заманауи білім беру технологиялары енгізіліп, оқушылардың жан-жақты дамуына барлық мүмкіндік қарастырылған. Мұғалімдердің кәсіби біліктілігін арттыру, мектептердің материалдық-техникалық базасын нығайту, цифрлық білім беру жүйесін дамыту бағытындағы жұмыстар кезең-кезеңімен жүзеге асырылып келеді. Жас түлектердің болашағына бағыт-бағдар беру, оларды отансүйгіштікке, еңбекқорлыққа және білімге құштарлыққа тәрбиелеу – қоғам алдындағы маңызды міндеттердің бірі. Сондықтан мектеп қабырғасынан түлеп ұшқан әрбір жас ел болашағына жауапкершілікпен қарап, алған білімін туған елінің дамуына жұмсай білуі қажет. Білім – адам өміріндегі ең басты құндылықтардың бірі. Тәуелсіз еліміздің болашағы – білімді, тәрбиелі, бәсекеге қабілетті жастардың қолында. Осы орайда, аудан мектептерінен түлеп ұшқан жас буынның еліміздің дамуына өз үлестерін қосып, биік белестерді бағындыратынына сенім мол.

«Мектебім, саған мың алғыс!» атты салтанатты шара жас түлектерге ерекше әсер сыйлап, олардың жүрегінде ұмытылмас естелік болып қалды. Білім ордасымен қоштасқан түлектер алдағы өмір жолында жаңа белестерді бағындыруға қадам басты. Мерекелік шара соңында түлектер мектеп ауласында қимастықпен қоштасып, ұстаздарына, ата-аналарына және білім ордасына деген ыстық ықыластарын білдірді. Сонымен қатар, мектеп бітірушілер дәстүрлі түрде естелік суретке түсіп, болашаққа үлкен үмітпен қадам басты. Жалағаш ауданы әкімінің баспасөз қызметі.