ӨНДІРІСТІК ЖӘНЕ ИНВЕСТИЦИЯЛЫҚ ЖОБАЛАРДЫҢ ЖҰМЫС ҚАРҚЫНЫ САРАЛАНДЫ

Кеше, 15:30

1 508

Бүгін облыс әкімі Мұрат Ергешбаев қала аумағында жүзеге асырылып жатқан бірқатар инвестициялық және өндірістік жобалардың қазіргі жай-күйімен танысып, құрылыс нысандарындағы жұмыстардың барысын бағамдады. Сапар барысында кәсіпорындардың өндірістік мүмкіндіктері, жаңа жұмыс орындарын ашу, отандық өнім үлесін арттыру және инвестициялық жобаларды белгіленген мерзімде іске асыру мәселелеріне назар аударылды.

Аймақ басшысы алдымен қаланың сол жағалауында орналасқан «Alem Asia Trade» серіктестігінің автокөлік салонына барды. Жоба өңірдегі кәсіпкерлікті дамытуға, халыққа ұсынылатын қызмет түрлерін кеңейтуге және тұрғындарды тұрақты жұмыспен қамтуға бағытталған. Кәсіпорын аясында 21 жаңа жұмыс орны ашылған. Автосалонның алдағы уақытта айына орта есеппен 20 автокөлік сату жоспары бар.

Қазіргі таңда орталық Оңтүстік Кореяның KIA автокөлік маркасының ресми дилерлік орталығымен бірлесіп жұмысын бастаған. Бұл тұрғындарға заманауи автокөліктерді таңдап, сатып алуға қолайлы жағдай жасауға мүмкіндік береді. Сонымен қатар жоба жергілікті нарықтағы қызмет көрсету сапасын арттырып, жаңа жұмыс орындары арқылы қаланың экономикалық белсенділігін күшейтуге ықпал етеді.

Одан кейін облыс әкімі «Достық» жеке кәсіпкерлігіне қарасты шыны пакеттер өндіретін автоматтандырылған өндіріс цехының жұмысымен танысты. Өткен жылы іске қосылған кәсіпорынның негізгі қызмет бағыттары – ПВХ профильдерін ламинациялау және шыны пакеттер өндіру. Өндіріс орнының жылдық қуаттылығы 1 миллион шаршы метрді құрайды. Қазіргі уақытта мұнда 27 адам тұрақты жұмыспен қамтылған.

Кәсіпорында заманауи технологиялар мен автоматтандырылған өндірістік желі қолданылады. Соның нәтижесінде бір шыны пакетті дайындауға кететін уақыт бұрынғы 10 минуттан 1 минутқа дейін қысқарған. Яғни өндіріс жылдамдығы шамамен он есе артып, тапсырыстарды қысқа мерзімде орындауға мүмкіндік туған. Бұл өз кезегінде өнім сапасын тұрақтандыруға, еңбек өнімділігін арттыруға және өндірістік шығындарды оңтайландыруға жағдай жасайды.

Өндіріс орнының тағы бір маңызды ерекшелігі – пайдаланылатын шикізат пен материалдардың басым бөлігінің отандық өндірушілерден жеткізілуі. Қолданылатын шикізаттың шамамен 90 пайызы Қазақстанда өндірілген өнімдерден тұрады. Негізгі шикізаттың бірі – Қызылорда қаласындағы «Orda Glass» жауапкершілігі шектеулі серіктестігі өндіретін табақша шыны.

Мұндай өзара әріптестік жергілікті кәсіпорындар арасындағы өндірістік байланысты нығайтып, өңір ішіндегі кооперацияны дамытуға ықпал етеді. Сонымен қатар отандық шикізатты пайдалану тасымалдау шығындарын азайтуға, жеткізу мерзімдерін тиімді жоспарлауға және жергілікті өндірушілердің өнімдеріне деген сұранысты арттыруға мүмкіндік береді.

Жобаны жүзеге асыру барысында кәсіпорынға екінші деңгейлі банктер, мемлекеттік субсидиялау тетіктері және «Қызылорда» өңірлік инвестиция орталығы арқылы қосымша қаржылық қолдау көрсетілген. Бұл өндірістік бастамаларды қаржыландыруда мемлекеттік қолдау құралдарының маңызын айқындайды.

Бұдан кейін аймақ басшысы мамыр айында іске қосылған «Медстрой-Шаңырақ» нейромед протездік-ортопедиялық орталығының қызметімен танысты. Орталық тұрғындарға протездік-ортопедиялық қызмет көрсетуге және медициналық оңалту бағытындағы мүмкіндіктерді кеңейтуге арналған. Мұнда азаматтардың қажеттіліктеріне сәйкес тиісті қызметтер көрсетіліп, арнайы медициналық жабдықтар пайдаланылуда.

Қазіргі уақытта орталықта 10 адам еңбек етеді. Нысан қажетті құрал-жабдықтармен қамтамасыз етілген. Негізгі жабдықтар Қытай мен Ресейден жеткізілген. Орталықтың іске қосылуы өңірдегі медициналық қызмет көрсету аясын кеңейтіп, протездік-ортопедиялық көмекке мұқтаж тұрғындар үшін қосымша мүмкіндік қалыптастыруға бағытталған.

Мұндай әлеуметтік маңызы бар жобаларды дамыту халықтың өмір сүру сапасын жақсартуға, медициналық оңалту қызметтерінің қолжетімділігін арттыруға және осы саладағы мамандардың кәсіби әлеуетін дамытуға ықпал етеді.

Сапар барысында облыс әкімі Абай ауылында салынып жатқан 800 бас ірі қараға арналған бордақылау алаңының құрылыс жұмыстарын да көрді. Жобаны «Қызылорда Құрылыс НК» серіктестігі жүзеге асыруда. Кәсіпорын тарапынан жобаға 7,5 миллиард теңге көлемінде инвестиция бағытталған. Нысан толық іске қосылған кезде 50 жаңа жұмыс орнын ашу көзделіп отыр.

Қазіргі уақытта бордақылау алаңының бірінші және екінші қоражайларының құрылысы жүргізілуде. Жұмыстар кезең-кезеңімен атқарылып, нысанды желтоқсан айында пайдалануға беру жоспарланған. Жобаның жүзеге асуы ауыл шаруашылығы саласындағы өндірістік әлеуетті арттырып, мал шаруашылығын дамытуға және ауыл тұрғындарын тұрақты жұмыспен қамтуға мүмкіндік береді.

Ірі қара мал бордақылау алаңының іске қосылуы өңірдегі агроөнеркәсіп кешенін дамытуға, ет өндірісінің көлемін ұлғайтуға және ауыл шаруашылығы өнімдерін өндіру бағытындағы кәсіпкерлік бастамаларды қолдауға оң әсерін тигізеді. Сонымен қатар мұндай инвестициялық жобалар ауылдық аумақтардың экономикалық белсенділігін арттырып, жергілікті халықтың табыс көздерін көбейтуге жол ашады.

Жалпы, облыс әкімінің жұмыс сапары барысында өндіріс, сауда, медициналық қызмет көрсету және ауыл шаруашылығы бағыттарындағы жобалардың жүзеге асу барысы сараланды. Аталған бастамалар өңір экономикасын әртараптандыруға, инвестиция тартуға, заманауи технологияларды енгізуге және жаңа жұмыс орындарын ашуға бағытталған.

Аймақ үшін маңызды жобалардың сапалы әрі уақытылы іске асуы экономикалық өсімді қамтамасыз етумен қатар, жергілікті кәсіпорындардың өзара байланысын күшейтіп, отандық өнім өндірісін дамытуға мүмкіндік береді. Осыған байланысты өндірістік қуаттарды тиімді пайдалану, құрылыс жұмыстарын белгіленген мерзімде аяқтау және инвестициялық міндеттемелердің орындалуы тұрақты назарда болады.

Қызылорда облысы әкімінің баспасөз қызметі